Magnus Powell hevur staðið á odda fyri KÍ síðani 2025, og hevur ongan dyst tapt á føroyskari jørð. Harafturat hevur hann vunnið føroyameistaraheitið og løgmanssteypið í fjør. Tað eru 26 ár síðani KÍ vann greipuna seinast og í ár liggur KÍ fremst í deildini aftaná 13 umfør og um eina góða viku hevur felagið møguleika at vinna seg í enn eina løgmansfinalu.

- Eg njóti hvønn dag í Klaksvík og í KÍ, og eg ætli at gera arbeiðið ordiliga liðugt. Vit hava alt at spæla fyri í landskappingini og í kappingin um løgmanssteypið, og um stutta tíð skulu vit taka dystin upp í Champions League. Eg síggi fram til hesar uppgávur, og málið er at enda hetta kappingarárið sannførandi  og tryggja at felagið framhaldandi er í menning bæði í Føroyum og Evropa, sigur Magnus Powell.

Magnus undirstrikar, at avgerðin um at gevast er tikin í góðari tíð, so felagið hevur best møguleika at leggja framtíðina til rættis.

- Eg boðaði nevndini herfyri frá, at hetta verður mítt seinasta ár í KÍ, tí eg ynskti eg geva KÍ bestu møguleikar at finna nýggjan venjara í góðari tíð. Eg síggi fram ímóti at arbeiða víðari við leikarum og venjaratoyminum, so yvirgongdin verður smidlig og góð, so liðið far bestu fortreytir.

Vit hyggja fram í tíðina

Tummas Lervig, formaður í KÍ, er fegin um at felagið longu nú hevur avgreitt venjaraspurningin fyri komandi tvey árini. Hann vísur á, at tað hevur stóran týdning, at byggja víðari upp á góðu gongdina, sum felagið hevur verið í seinastu árini.

- Fróði er eitt sera kent navn í føroyska fótbóltsheiminum, og sum leikari hevur hann altíð gingið á odda. Vit eru sannførd um, at Fróði kann geva KÍ nógv, bæði við sínum royndum sum leikari og góða innliti hann hevur í fótbóltin.

- Vit royna allatíð at hyggja langt fram í tíðina, og fyrireika okkum best møguligt, so grundarlagið undir felagnum er sterkt. Tí eru vit eisini sera glað fyri, at Magnus Powell hevur boðað okkum frá í so góðari tíð.

- Magnus Powell hevur gjørt eitt fantastiskt arbeið í KÍ, sum vit hava verið sera væl nøgd við og errin av. At vinna greipuna í fjør var framúr, og liðið hevur ment seg nógv undir leiðslu av Magnus Powell og hansara toymi.

- Nú snýr tað seg um at enda kappingarárið sterkt, og klára okkum væl í Evropa, sigur Tummas Lervig, formaður í KÍ.

Fróði Benjaminsen gleðir seg til stóru uppgávuna

- Hetta verður ein sera spennandi og stór uppgáva. KÍ hevur klára seg sera væl undir leiðslu av Magnus Powell, og tað skulu vit byggja víðari uppá, saman við leikarum, venjaratoymi, leiðslu og hjálparfólkum.

2 ára sáttmáli er gjørdur við Fróða Benjaminsen, sum byrjar frá komandi kappingarári. Spurdur hvat hann skal fáa tíðina at ganga við fram til komandi kappingarár, so er Fróði greiður.

- Sjálvandi komi eg at fylgja eyka væl við KÍ komandi tíðina, og mítt fokus verður at fyrireika komandi kappingarár og samskifta við Magnus Powell, so vit fáa eitt gott fundament fyri framtíðina.