Bjørt broytt raðfylgjuna: Suðuroyartunnilin fyrst
Í gjár sóu vit, at Bjarni Kárason Petersen og Karlot Hergeirsson antin ikki kendu til, ella ikki virdu, semjuna millum Javnaðarflokkin og Framsókn um “Quid pro quo” – nakað fyri nakað. Avtalan var, at Javnaðarflokkurin skuldi taka undir við hægri pensiónsaldri, og afturfyri skuldi Framsókn bera Suðuroyartunnilin ígjøgnum. Javnaðarflokkurin helt sín part av avtaluni, men tað gjørdi Framsókn ikki. Í morgin skulu framsóknarfólk fyrst bekenna kulør, áðrenn javnaðarfólk gera tað.
3. viðgerð av málinum um Suðuroyartunnilin skuldi koma aftaná 3. viðgerð av pensjónsmálinum í morgin, men nú hevur løgtingsforkvinnan, Bjørt Samuelsen í Tjóðveldi, skift tey bæði málini um, soleiðis at Suðuroyartunnilin kemur fyrst.
Tað merkir, at um Karlot Hergeirsson og Bjarni Kárason aftur í morgin velja fríspæl fram um samgonguavtaluna og atkvøða ímóti, so er so gott sum púra vist, at javnaðartingfólkini heldur ikki fara at hjálpa Framsókn við at hækka pensjónsaldurin.
Tingfundurin byrjar kl. 11 í morgin, mikudagin 25. februar, og Suðuroyartunnilin er 2. málið á skránni og pensiónsaldurshækkingin 3. málið.