Liberaliseringin av fosturtøkulógini var millum stóru málini hjá Framsókn í fjør. Tá atkvøddu 2 javnaðartingfólk ímóti, eins og 2 í Framsókn. Samgongan var við øðrum orðum orsøkin til, at málið hjá Framsókn fall. Møguleikin fyri at leggja tað fram aftur varð nevndur, men tað er ongantíð hent og fer neyvan at henda í hesum valskeiðnum.

Síðani komu kravboð frá Framsókn um, at pensiónsaldurin skuldi hækka til 70 ár, munandi skjótari enn annars. Hetta var treytin fyri at taka undir við Suðuroyartunlinum. Til 2. viðgerð bar samgongan eisini uppskotið ígjøgnum, men í gjár frættist, at 3 javnaðartingfólk og 1 tjóðveldistingfólk høvdu fingið kaldar føtur, og harvið var ikki meiriluti longur.

Ruth Vang varð eisini sett upp á pláss av løgmanni, tá hon ætlaði at fara í gerðarrættin við streykandi fakfeløgunum í fjør.

Framsókn hevur ført seg fram sum flokkurin, sum ynskti ”Haldføri fyrst og fremst”. Har gongur ongan veg við tí, og allar fíggjarlógirnar hjá Ruth Vang hava víst stórt undirskot. Í farnu viku tók Landskassin lán upp á 1,3 milliard, mest fyri at gjalda gamla skuld við. Føroyar mala nú runt við læntum pengum.

Viðurkennir, at ongi tøk eru tikin á haldførisleið

Við Kringvarpið á miðdegi segði Ruth Vang, at tað er ”óforsvarligt at fara undir eina so stóra verkætlan uttan at hava tikið nøkur tøk á haldførisleið”.

Ruth Vang vísti annars til løgmann, tá journalisturin spurdi hana, hvat nú fer at henda víðari. Í 2017 høvdu vit eina líknandi støðu, har politiskt kaos valdaði á Føroyalandi, og løgtingsformaðurin sendi Løgtingið í ófríviljaða summarferiu. Eins og nú var orsøkin til kaosið, at Javnaðarflokkurin ikki hevði undirtøku í egnum rekkjum fyri einum politiskum stórmáli hjá samgonguni. Tá fór løgmaður á Oyggjaleikir, meðan politisku brotasjógvarnir skolaðu í Føroyum. Hesa ferð er meira enn ein mánaður til Oyggjaleikir, so Aksel svarar helst hesaferð. 

Men fyri Javnaðarflokkin er tað gott, at uppskotið um hægri pensiónsaldur varð tikið aftur. Tað er tað, sum samlaða Verkafjøldin hevur biðið Javnaðarflokkin og Tjóðveldi um, og teir hava nú aktað. 

Framsókn lovaði hinvegin sínum veljarum haldføri, og á tí kontuni vantar framvegis, at fyrsta fetið verður tikið.

Tí tað verður dekan ov soltið at fara til val í 2026 við bert longdari upplatingartíð í Rúsuni á avrikslistanum.