Februar byrjaði við veðrinum, sum januar slepti. Eystanvindurin, ið eyðmerkti seinnu helvt av januar, helt fram hálva aðru viku inn í februar. Hetta komst av, at lágtrýst hava konsekvent ligið í útsynning úr Føroyum, ímeðan hátrýst hava ligið í landnyrðing úr Føroyum, sum mynd 2 vísur. Av tí at luft melur ímóti klokkuni runt um lágtrýst og við klokkuni runt um hátrýst, hava hesi drigið kalda luft ímillum sín eystaneftir ímóti Føroyum. Máldi hitin á veðurmastrini uttan fyri Veðurstovu Føroya í Tórshavn lá ímillum 1,4°C og 7,5°C hesar dagarnar; í miðal 5°C.

Støðukort tann 5. februar 2026 kl. 00:00 UTC. Eitt lágtrýst liggur vestan fyri Bretland, og eitt hátrýst liggur í Norskahavinum. Hesi draga kalda luft eystaneftir ímóti Føroyum. Kelda: Deutcher Wetterdienst.

Tann 11. februar fór eitt lágtrýst tvørtur um Bretland vestaneftir, sum veðurkortið á mynd 3 vísir. Næstu dagarnar lógu lágtrýst sum heild í økinum eystan fyri Føroyar fram til síðstu vikuna í mánaðinum. Hetta hevði við sær, at vit fingu eitt kalt høgættarrák í hálva aðru viku, serliga av útnyrðingi. Máldi hitin í Havn lá hesar dagarnar ímillum -3,4°C og 4,6°C; í miðal 1°C.

Støðukort 12. februar 2026 kl. 00:00 UTC. Eitt lágtrýst er á veg eystureftir tvørtur um Bretland, ið næstu dagarnar hevði við sær eitt kalt høgættarrák yvir Føroyar. Kelda: Deutcher Wetterdienst.

Veðrið síðstu vikuna í februar var meira umleypandi við vindi bæði frá eystri og vestri. Hetta var eisini vikan í mánaðinum, har mátingarnar í Tórshavn máldu einasta stormin, t.v.s. vindferðin var oman fyri 20,8 m/s. Stormurin kom frá einari kuldabrúgv, ið fór tvørtur um Føroyar vestaneftir mikunáttina 25. februar, sum veðurkortið á mynd 4 vísir. Mesta málda vindferðin í Havn var beint eftir midnátt: 23,3 m/s av útsynningi vestri.

Støðukort 25. februar 2026 kl. 00:00 UTC. Ein kuldabrúgv úr einum lágtrýsti norðanfyri er yvir Føroyum, ið hevði við sær einasta stormin í Havn februar. Kelda: Deutcher Wetterdienst.

Mynd 5 niðanfyri vísir eina vindrósu fyri tey trý omanfyristandandi tíðarskeiðini. Her sæst týðiligt, at eysturættin setti dám á fyrru hálvu aðru vikuna, høgættin setti dám á seinnu hálva aðru  vikuna, meðan síðsta vikan var meira umleypandi.

Vindrósir fyri málda vindin uttan fyri Veðurstovu Føroya í Havn fyrstu hálvu aðru viku í februar mánaða (ovast til vinstru), aðru hálvu aðru viku í februar mánaða (ovast til høgru), síðstu vikuna í februar mánaða (niðast til vinstru) og samlað allan februar mánaðan (niðast til høgru). Dátukelda: Veðurstova Føroyar.

Nøkur hagtøl fyri mátingarnar allan februar eru víst í talvu 1. Í stuttum kann sigast, at miðalhitin, miðal vindferðin og samlaða avfallið vóru øll minni í 2026 samanborið við ein miðal februarmánaða, sí

https://drive.google.com/file/d/1V9zIqQQJUgqFFc_a0wBuDxQWS0Hm1Ang/view.

Hagtøl februar 2026 fyri hita, vind og regn uttan fyri Veðurstovu Føroya í Tórshavn. Dátukelda: Veðurstova Føroya.

Í hesi grein hevur serliga verið fokus á mátingar uttan fyri Veðurstovuna í Tórshavn, m.a. tí at her hava vit flestu mátingar yvir longri tíðarskeið at samanbera við. Men Veðurstova Føroyar hevur í alt fimm veðurstøðir kring landið. Veðrið er ofta ymiskt frá staði til stað. Mynd 5 og 6 niðanfyri vísa málda vindin og hitan á øllum okkara veðurstøðum fyri allan februar mánaðan. Fyri nærri lýsing av veðrinum á hesum støðunum ber til at fara inn á veðursavnið hjá okkum, sí

https://www.vedur.fo/fo/vedursavn. 

Mátaða vindferðin í februar 2026 á fimm veðurstøðunum kring landið. Dátukelda: Veðurstova Føroya.

Mátaði hitin í februar 2026 á fimm veðurstøðunum kring landið. Dátukelda: Veðurstova Føroya.