Í meira en 20 ár var eg handilsmaður í Skopun, áðrenn eg í fjør fór í starv sum sølumaður hjá Føroya Tele.

Saman við konuni havi eg eisini eina evangeliska tænastu, har vit ferðast kring landið og á netinum við okkara sangi og boðskapi.

Eg havi valt at stilla upp í politikki, tí eg ynski at gera ein mun fyri ta føroysku familjuna. Frá tí minsta barninum til tey elstu í samfelagnum.

At síggja menniskju trívast og hava tað gott er grundarlagið undir tí, eg brenni fyri. Familjan er hornasteinurin undir okkara samfelagi. Hon skal styrkjast, ikki tyngjast við fleiri byrðum og meira trýsti.

Føroyar skulu vera eitt land, sum ikki bara fylgir við streyminum og ger sum øll hini, men eitt land, sum torir at ganga egnar leiðir og velja loysnir, sum tæna Føroyum best. 

Her eru nøkur av mínum hjartamálum:

• Rætturin til lívið skal tryggjast við lóg og fría fosturtøkulógin skal ikki setast í gildi. 
• Familjan skal hava góð og trygg kor. Pengarnir skulu fylgja barninum, og hjún skulu hava møguleika at samskattast.
• Føroyar skulu hava ein greiðan og ábyrgdarfullan útlendingapolitikk. Tað merkir nei til moskur í Føroyum, og talið av innflytarum skal lækkast. Tað skal vera greitt eftirlit við, hvør sleppur inn í landið.
• Allir føroyingar skulu hava rætt til viðgerðartrygd í heilsuverkinum.
• Eykarokningin, sum okkara sjómenn fingu frá sitandi samgongu, skal strikast.

Eg stilli upp, tí eg trúgvi upp á Føroyar.

Eg trúgvi upp á familjuna.

Og eg trúgvi upp á, at vit saman kunnu skapa eitt tryggari og sterkari samfelag.

Eg stilli upp fyri Miðflokkin og um hesi áhugamál eisini eru týdningarmikil fyri teg, kanst tú trygt seta x á tín atkvøðuseðil fyri mær.