Fyrr í ár boðaði Kringvarpið fyriskiparunum rættiliga seint frá, at tey ikki fóru at senda frá Fiskivinnutinginum á Torradøgunum í Klaksvík. Skotbráðið var ov stutt til at finna nakran annan, ið kundi standa fyri tí, og úrslitið bleiv tí, at tað annars altíð væl vitjaða Fiskivinnutingið var av ongum í ár.

Og nú er so greitt, at Kringvarpið heldur ikki fer at senda frá valfundum kring Føroya land, sum annars hevur verið siðvenja til val. Hvørki til fólkatingsvalið ella løgtingsvalið.

Til valstríðið til fólkatingsvalið í 2022 sendi Kringvarpið frá valfundum á miðnámsskúlunum kring landið – Miðnámsskúlanum í Suðuroy, Miðnámi á Kambsdali, Miðnámi í Vestmanna, Tekniska Skúla í Klaksvík, Glasi í Tórshavn, umframt í SMS og í Sortudíki. Vit vita, at fleiri, um ikki allir, miðnámsskúlarnir aftur fara at hava valfundir í ár, men hesa ferð verður tað altso uttan Kringvarpið.

Onki er tó at taka seg aftur í, at valfundirnir hava verið bæði populerir og minniligir – hvør minnist ikki eitt nú pinnpakkaða valfundin á Skúlatrøð í Klaksvík til løgtingsvalið í 2019, tá m.a. Tórbjørn Jacobsen og Jacob Vestergaard vóru í hørðum orðadrátti, og sum endaði við, at síðstnevndi varð karikeraður sum Pingu á sosialu miðlunum?

Almennir valfundir, har meinigi veljarin hevur møguleika fyri at seta valevnum beinleiðis spurningar, og verða hoyrdur av fjøldini, eru ein umráðandi partur av fólkaræðinum, og tí fer framhaldandi at verða skipað fyri valfundum, men hvørt tað verður stroymt ella útvarpað frá teimum, nú public service-stovnur okkara hevur kastað frá sær, verður í ár upp til privatar fyriskiparar av einstøku valfundunum og privatar miðlar.