Eftir fleiri ár við minkingum sær nú út til, at toskakvotan í Barentshavinum kann hækka aftur komandi ár. Sambært russiska miðlinum Interfax verður mælt til at seta samlaðu kvotuna fyri 2027 til 312.667 tons – ein hækking upp á nærum 10 prosent samanborið við 2026.

Grundarlagið undir tilmælinum eru nýggjar metingar av fiskastovninum, har serliga verður víst á, at árgangurin frá 2021 hevur givið vónir um eina betri gongd enn fleiri av teimum undanfarnu.

Kortini verður víst á, at støðan framvegis er viðbrekin. Hóast hækkingina verður kvotan framvegis ein av teimum lægstu í meira enn tjúgu ár, og fleiri av teimum yngru árgangunum verða mettir sum veikir.

Barentshavið er eitt av týdningarmestu økjunum fyri toskaveiðu í Norðuratlantshavi, og tí verða broytingar í kvotunum fylgdar neyvt eisini í Føroyum, har tær kunnu fáa ávirkan á bæði fiskivinnu og marknaðarviðurskifti.