Sum liður í fyrireikingunum vóru nakrir av skótunum, sum fara til Danmarkar, savnaðir á fyrireikandi legu í Klaksvík um vikuskiftið. Har fingu tey høvi at venja ymiskar førleikar, sum verða gagnligir á stóru leguni.

Skótarnir gingu túr við ryggsekki, svóvu í tjaldi og matgjørdu á stormkøki. Umframt hetta var pionering á skránni, har tey bygdu borð og aðrar hentleikar úr træi.

Legan í Klaksvík var bæði spennandi og væl eydnað. Luttakararnir fingu roynt nakað av tí, sum tey fara at gera á stóru leguni seinni í summar, samstundis sum tey lærdu hvønn annan betur at kenna, áðrenn leiðin gongur til Danmarkar.

Vónirnar eru stórar, og bæði skótar og leiðarar gleða seg til eina minniliga uppliving saman við túsundtals øðrum skótum úr øllum heiminum.