Eitt lágtrýst fer í dag at leggja seg yvir Ísland, og tað fer at draga lýggja luft til sín – og á leiðini liggja vit. Hetta fer at vera líka fram til seinnapartin hósdagin, tá ið eitt lágtrýst fer eystureftir beint sunnanfyri. Tá fer ættin úr landsynningi upp í norðan, og dagin eftir gongur hann so vesturum til útnyrðing.

Veðrið í vikuni – dag fyri dag:  

Mánadagin:

Lot til frískt lot sunnan, 3 til 8 m/s, smá- ella hálvskýggjað og kanska okkurt ælið. Um náttina gongur hann eystur til landsynning, skýggjað og okkurt ælið. Hitin 9 til 12 stig.

Týsdagin:

Lítið lot sunnan, minni enn 5 m/s, smáskýggjað og okkurt ælið í støðum. Um kvøldið og náttina lítið lot av útsynningi, minni enn 5 m/s, smáskýggjað og yvirhøvur turt. Hitin 9 til 12 stig.

Mikudagin:

Lítið lot av útsynningi, minni enn 5 m/s, smáskýggjað og okkurt ælið í støðum. Hitin 8 til 12 stig.

Hósdagin:

Lot til frískt lot av landsynningi, 3 til 8 m/s, hálvskýggjað og yvirhøvur turt. Seinnapartin gongur hann upp í eystan, tað dregur á luftina og fer at regna. Um kvøldið lot til frískt lot av landnyrðingi, 3 til 8 m/s, samdrigið og regn. Um náttina hækkar hann upp í norðan. Hitin 9 til 11 stig.

Fríggjadagin:

Lot til frískt lot norðan, 3 til 8 m/s, sum fyrrapartin gongur niður í útnyrðing, samdrigið og okkurt ælið. Hitin 8 til 11 stig.