Mette Frederiksen úr Socialdemokratiet, Pia Olsen Dyhr úr Socialistisk Folkeparti, Lars Løkke Rasmussen úr Moderatunum og Martin Lidegaard úr Radikalu Vinstra løgdu samgongugrundarlagið fyri nýggju donsku stjórnini í dag á Marienborg.

Eitt av átøkunum, nýggja stjórnin ætlar, er at tannlæknavitjanir skulu gerast ókeypis. Í fyrstu atløgu skulu einans fyritíðarpensiónistar og sárbærir bólkar, sum tað eitur, fáa ókeypis viðgerð. Men ætlanin er, at í 2035 skulu tannlæknavitjanir, sum ikki eru kosmetiskar, vera ókeypis fyri øll.

Dýri biðidagur skal innførast aftur – men ikki fyrrenn í 2030. Tað er Socialistisk Folkeparti, sum hevur kravt at fáa hann aftur, men longu nú sær lesarin, at 2 av høvuðspunktunum í nýggja samgongugrundarlagnum ikki verða íverksett fyrrenn eftir næsta fólkatingsval.

Av øðrum átøkum stendur, at almenn samferðsla skal gerast ókeypis (les: skattafíggjað) fyri børn og ung upp í 22 ár, og so skal MVG’ið avtakast á fruktum og grønmeti, ætlar stjórnin.

Um Føroyar stendur, at nýggja danska stjórnin fer at stuðla føroysku ynskjunum um sjálvstøðugar limaskapir í WTO og IOC, og at hon er opin fyri at veita statslán til at fíggja Suðuroyartunnilin, um føroysku myndugleikarnir ynskja tað.

Í morgin, mikudagin 3. juni, kl. 10 danska tíð (kl. 9 føroyska) verður kunnugt, hvørjir ministarar vera í nýggju stjórnini.