Esmar er føddur í 1932, so tað er rættuliga inspirerandi at síggja, at hann framvegis er so aktivur.

Vit fingu sjálvandi eitt gott prát.

Esmar er sonur hin navnframa Eiðis-Jóhan í hansara seinnu giftu. Mamman var Elsebeth Fredrikke Hansen úr Haraldssundi. Eiðis-Jóhan og Elsebeth giftust í 1926, tvey ár aftaná at fyrra kona Eiðis-Jóhan, Christina Malena í Innistovu í Vági, doyði.

Tá hon varð jarðað í 1924, blivu hon og systurin, Sofía Malena, lagdar í somu grøv, tí tær doyðu dag um dag.
Christina Malena var dóttur hin ikki minni navnframa Hoyrikk á Nesi.

Hoyrikkur var úr Innistovu á Trøllanesi og flutti til Klaksvíkar, har hann í 1877 giftist Elsebeth Thominu í Vági.
Tað var gott samband millum Trøllanes og Vág, tí pápi til konu Hoyrikk, Jógvan bóndi í Vági, hevði konu úr Innistovu á Trøllanesi.

Hoyrikkur og konan fingu eina trøð av Vágshaga, innanfyri Víkará, og bygdu har. Tey húsini standa beint omanfyri mítt barnaheim í Víkunum, har sum Malan og Kissa búgva í dag.

Hoyrikkur sigst vera fyrsti jarnsmiður í Klaksvík burturav, og var hann tann fyrsti, sum hevði lærlingar. Teirra millum vóru Jógvan í Grótinum og gamli Samson.

Ikki sørt, at Esmar hevur eina áhugaverda familjusøgu.

Tá vit skiltust í dag avtalaðu vit at taka prátið uppaftur, næstu ferð vit hittast á Guttabreytini.