Klaksvíkar kommuna ynskir ikki Føroya Bjór úr kommununi
Eg gjørdist ikki sørt skakkur, tá eg í morgun sá á Norðlýsinum, at Annika Waag, sum var á býráðsfundi í gjárkvøldi, fekk tað uppfatan, at Klaksvíkar kommuna als ikki ynskir Føroya Bjór í býnum, ella í kommununi yvirhøvur.
Orsøkin var eitt mál um parkering í miðbýnum, har ein partur av málinum var eitt 900 fermetrar stórt økið, sum Føroya Bjór skuldi hava loyvi at nýta.
Drúgt samskifti hevur verið við Føroya Bjór um økið millum matrikullin hjá Føroya Bjór og kanalina, sum skal gerast vestanfyri nýggja hotellið. Hetta er eitt øki uppá einar 2500 fermetrar av kommunalum lendi, har kommunan saman við eigarnum av nýggja hotellinum hava gjørt avtalu um at leggja eitt alment parkeringspláss, sum skal taka 30 – 35 bilar.
Hetta hevur Føroya Bjór fingið til viðmerkingar og góðkent. Restin, uml. 900 fermetrar er meiningin, at Føroya Bjór skal fáa loyvi at nýta til sítt virksemi.
Tað sum Føroya Bjór og Klaksvíkar kommuna ikki eru samd um, er hvussu leingi Føroya Bjór skal hava rættin til lendi.
Tað, sum býráðið samdist um í gjárkvøldið var at fremja Parkeringsplássi og annars taka upp samraðingar við Føroya Bjór um nýtslu av lendinum.
Nei, Klaksvíkar kommuna ynskir ikki á nakran hátt at reka Føroya Bjór úr kommununi.
Vinarliga. Karl Johansen
Borgarstjóri