Varpið hevur verið sera væl vitjað og nógv brúkt til ymisk størri og smærri tiltøk. Umleið 600 tiltøk hava verið í Varpinum, síðani dyrnar lótu upp í oktober 2023.

Bara í 2025 vórðu umleið 270 tiltøk, av øllum handa slagi, m.a. konsertir, sjónleikir, framsýningar, fyrilestrar, vinnutiltøk, vitjanir, rundvísingar, fundir, brúdleyp, føðingardagar, borgarafundir, kjakfundir, palllistaskúli, opin pallur, kafé-kvøld, livandi tónleikur, kórvenjingar, sjónleikavenjingar, tónleikavenjingar, studio-upptøkur, listaframsýningar, hátíðarhald, grækarismessa, flaggdagshald, jólahald, og vit kundu hildið fram.

Fyri ikki at nevna FMA, Ítróttarfagnaðin, Várkonsertin hjá Føroya Symfoniorkestri, sum fekk nógv rósandi orð við á vegnum.

Grunnurin verður umsitin av einum stýri við 5 limum, sum verða valdir soleiðis:

• Klaksvíkar Sjónleikarafelag velur ein lim,

• Norðoya Listafelag velur ein lim,

• Vinnulívsráðið í Klaksvík velur ein lim, og

• Klaksvíkar Býráð velur tveir limir

Limirnir verða valdir fyri 4 ár í senn aftaná eitt býráðsval.

Stýrið skipar seg sjálvt við formanni og varaformanni.

Stýrið ásetir nærri reglur fyri virki sítt og er heimilað at seta dagligan leiðara fyri grunnin at samskipa virksemið

Ársfundur

Ein serstakur stýrisfundur verður á hvørjum ári hildin fyri 1. apríl (ársfundur). Á hesum fundi hava nevndirnar hjá Klaksvíkar Sjónleikarafelag, Norðoya Listafelag, Klaksvíkar Hornorkestri, Vinnulívsráðnum í Klaksvík, Klaksvíkar Tónleikarafelag, og Klaksvíkar Býráð talurætt, meðan valdu umboð teirra hava atkvøðurætt. Ársfundurin verður lýstur minst 14 dagar frammanundan.

Ársfundurin verður hildin við hesi dagsskrá:

1 - Formansfrágreiðing um farna roknskaparár, og roknskapurin skal góðkennast.

2 - Ársfrásøgn Grunsins verður løgd fram til góðkenningar.

3 - Samsýning til stýrið verður møguliga ásett.

4 - Val av grannskoðara.

5 - Ymiskt.

Ársfundur verður í Varpinum fríggjadagin 10. apríl 2026 - kl. 15.00