Í Fólkaflokkinum var Jørgen Niclasen nummar eitt við 691 atkvøðum. Formaðurin, Beinir Johannesen, var heilt niðri á 5. plássi við 441 atkvøðum – aftan fyri Elsebeth M. Gunnleygsdóttur, Símun Jóanesarson Hansen og Astrið Breckmann á ávikavist 2., 3. og 4. plássi.

Í Sambandsflokkinum var Anna Falkenberg sera langt framman fyri formannin, Bárð á Steig Nielsen, sum gamaní kortini varð næsti maður og tí er varafólk á Fólkatingi. Anna Falkenberg fekk 5.304 atkvøður og Bárður á Steig Nielsen einans 299 atkvøður.

Javnaðarflokkurin var ein søga fyri seg, har flokkurin stillaði upp til fólkatingsvalið við einum serskildum lista uttan formannin á. Sjúrður Skaale tók øll met og fekk 10.823 persónligar atkvøður. Signhild V. Johannesen gjørdist nr. 2 og er tí fyrsta varafólk á Fólkatingi.

Á Tjóðveldislistanum var gjørdist forkvinnan nummar 4 við 281 atkvøðum. Høgni Hoydal var fremsti maður við 1.532 atkvøðum, og honum á baki komu Jóhannis Erlendsson og Liljan Weihe og harnæst floksforkvinnan.

Og í Miðflokkinum var tað Steffan Klein Poulsen, ið fekk flestar atkvøður, 139 í tali, meðan formaðurin Jenis av Rana var nummar 2 við 97 atkvøðum. Her hoyrir tað til søguna, at av misgáum komu 6 av valevnunum ikki við á tann listan, sum fólkatingsvalevndin fekk frá flokkinum, og tað hevði møguliga broytt úrslitið.