Í samgonguskjalinum stendur, at ”Vit vilja skapa kappingarførar karmar fyri oljuvinnu[,] og tryggja, at oljutilfeingið kemur øllum samfelagnum og komandi ættarliðum til góðar. Inntøkurnar frá møguligari oljuútvinnan verða settar í Búskapargrunnin, og renturnar kunnu takast inn á fíggjarlógina. Partur av rentunum skal brúkast til grøna orkuskiftið”.

Um kjarnorku stendur nakað minni: ”Vit vilja kanna alternativar orkukeldur so sum kjarnorku og djúpan jarðhita”, men tá talan er um eitt fyrsta stig, er tað skilligt. Jarðheiti er grøn orka, og kjarnorka hevur sera lágt CO₂-útlát.

Og so verður latið upp fyri at geva teimum privatu ein munandi størri part av orkuframleiðsluni, tó í samstarvi við SEV. Har stendur ”Møguleiki skal vera hjá privatum at leggja net saman við SEV. Hetta eftir langtíðaravtalu millum partarnar, har SEV eigur netið”, ”Vit skulu skunda undir at loyva fleiri inn á marknaðin, sum framleiða inn á netið hjá SEV” og ”SEV keypir og selur alla elorku, ið verður flutt á elnetinum hjá SEV. Sølan fer fram í heilsølu ella smásølu. Tað skal vera gjørligt hjá privatum feløgunum at veita heildarloysnir til privatbrúkarar”.