”[J]eg veit ikki, um hetta er tjóðarsemjan, man tosar um, ella um hetta er tað, sum Sambandið hevur verið frammi við um ”Nýtt Samband, og tá tað nú er Bárður Nielsen, sum leggur tað út, so rokni jeg við, at tað er meira nýtt samband”, segði Sirið Stenberg við Kringvarpið á miðdegi.                 

Hóast 6 av 7 politiskum flokkum í Føroyum hava sagt seg taka undir við tjóðarsemjuni, so hava politikarar verið ymiskir á máli, tá teir verða spurdir um, hvat hon er um. Onkur politikari hevur sagt hana merkja fullveldi; onkur annar, hon merkir ein ríkjafelagsskapur millum 3 sjálvstøðug lond, og onkur triði, at hon bert er ein víðkað uttanríkispolitisk heimildarlóg, og at onki annars verður broytt í ríkisrættarligu støðuni.

Tað gevur nú at bíta.

Eftir øllum at døma er tjóðarsemjan ikki so væl fyrireikað, at tað ber til at síggja, hvat hon ítøkiliga er um, og hvat hon ítøkiliga merkir. Almenningurin og miðlar hava leingi spurt eftir henni, men hava ikki fingið svar - ella hava fingið mótstríðandi svar. Og eftir seinastu útmeldingunum í dag at døma er tað ikki, tí at politikararnir ikki vilja svara, men at sjálvt ikki teir kenna ítøkiliga svarið.

Har kann tað vísa seg at vera ein fyrimunur fyri Bárð á Steig Nielsen, sum nú fer at umsita uttanríkismál, at teirra ”Nýtt Samband” er fyrireikað frammanundan og ítøkiliga orðað á 6 síðum, sum liggja alment frammi. Og tí kann roknast við, at Sirið Stenberg fær rætt, tá hon sigur, at tað verður meira Nýtt Samband.