JAF kundi tað sama verið ein heilt annar flokkur
Har er himmalvíður munur á undirtøku fyri Lista C á Løgtingi og á Fólkatingi. Nýggjasta veljarakanningin, sum spyr.fo hevur gjørt fyri Portalin og FM1, gevur teimum uppstillaðu á javnaðarlistanum til fólkatingsvalið ein stórsigur, sum ikki er við mýkindum. Heili 40% av teimum spurdu siga seg fara at velja Javnaðarflokkin á Fólkating. Hin sessurin fer ikki óvæntað til Sambandsflokkin.
Veljarakanningin hjá spyr.fo fyri FM1 og Portalin er í tráð við kanningina hjá Lóðri fyri KvF, ið gav Javnaðarflokkinum 37,7%. Men hon er als ikki í tráð við kanningarnar til heimliga valið, ið geva Javnaðarflokkinum ein dyggan frammaná. Tí er líkt til, at Javnaðarflokkurin fer at stórsigra í morgin.
Til hetta valið gjørdi Javnaðarflokkurin eitt sats, sum var at stilla upp við fullkomiliga ymiskum listum til valini bæði. Annar var til Fólkatingið og hin til Løgtingið. Og í øllum førum tann fyrri sær út til at vera eitt plettskot. JAF í yvirskriftini merkir Javnaðarflokkurin á Fólkatingi, sum hevur ein sjálvstøðugan profil á sosialum miðlum.
Ongin ivi er um, hvør spísskandidaturin er, men tað kann gerast spennandi, hvør verður nr. 2 og harvið varafólk á listanum. Hini uppstillaðu eru óroynd í hesum sambandinum, og bert ein teirra hevur stillað upp til fólkatingsval áður.
Kanningin sigur, at størstur verður Javnaðarflokkurin við 40% av atkvøðunum; nummar tvey verður Sambandsflokkurin við 24,5%, og síðani kemur Tjóðveldi 17,3%, Fólkaflokkurin við 16% og aftastur Miðflokkurin við 2,2%. Harvið fáa Javnaðarflokkurin og Sambandsflokkurin sínar sessir umaftur.
Meira kann lesast um kanningina her.