Hóast várfrágreiðingin hjá Búskaparráðnum gevur ábendingar um eina møguliga vend í búskapinum, verður í frágreiðingini víst á, at almenni geirin støðugt veksur, bæði tá ið talan er um starvsfólktalið og um játtanir.

Í frágreiðingini væntar Búskaparráðið stórt undirskot á fíggjarlógini bæði í ár og komandi ár. Búskaparráðið mælir millum annað til at fremja nýskipanir, sum kunnu effektivisera almenna geiran, og at samtykkja eitt fíggjarpolitiskt regluverk.

Hesum er Føroya Arbeiðsgevarafelag samt í.

At økja um skattir og avgjøld hevði bert verið ein koddi hjá politisku skipanini, so tað slepst undan at fremja tær umskipanir, sum er neyðugar fyri at tryggja, at skattainntøkurnar hjá tí almenna kunnu brúkast meira effektivt.

Vit kappast við onnur lond um at draga starvsfólk og kapital at okkum. Øktir skattir og avgjøld høvdu gjørt Føroyar minni kappingarførar. Tvørturímóti er tørvur á at lækka skattin. Skal tað bera til, krevur tað, at almennu útreiðslurnar ikki økjast so skjótt, sum tær hava gjørt seinnu árini.

Tað er útreiðslusíðan og skipanin av tí almenna, sum má setast í miðdepilin. Meðan vit bíða eftir tí fíggjarpolitiska regluverkinum, sum samgongan ætlar at seta í verk, kann politiska skipanin taka fyrsta takið longu nú við at avmarka útreiðsluvøksturin á játtanarkørmunum fyri 2026. Tað er ikki nóg gott, at vit í bestu búskaparligu tíðum framhaldandi hava stórt hall á fíggjarlógini.

Sum tað javnan verður gjørt vart við, hava vit eina avbjóðing við vaksandi røktartørvi, so hvørt sum vit gerast eldri. Skal landskassin ikki fáa vaksandi hall komandi árini, mugu vit finna aðrar loysnir enn at seta fleiri almenn starvsfólk inn í verandi skipanir. Neyðugt er at fremja neyðugar nýskipanir, sum eisini stjórin í Almannaverkinum gjørdi vart við í farnu viku.

Føroya Arbeiðsgevarafelag mælir til at gera eina ætlan fyri nýskipan av teimum tyngstu útreiðslupostunum á fíggjarlógini og um markamót millum ymsu økini. Fleiri tankar og uppskot fyriliggja longu, men vilji má vera til at útinna tankarnar og uppskotini.