Siga vit, at Sambandsflokkurin kemur í stjórn og setir 2 tingfólk í Landsstýrið, koma Magni Højgaard og Anna Falkenberg á Løgting. Men av tí at Anna Falkenberg er vald í Fólkatingið, og tí at dupultmandat generelt eru óynskt, so kemur Hermann R. Samuelsen á Løgting. Hermann Samuelsen situr eisini í Klaksvíkar Býráði.

Til kommunuvalið fyrraárið vórðu Karl H. Johansen og Hermann innvaldir. Meginreglan um ikki at loyva dupultmandatum kann gera, at Hermann Samuelsen leggur býráðssessin frá sær, men tað merkir so eisini, at Áron Vest, ið er fyrsti varalimur, kemur í býráðið. Og hann hevur meldað seg úr Sambandsflokkinum.

Kemur Áron Vest í býráðið, kann tað tí merkja, at hann ikki stuðlar samgongumeirilutanum har, og býráðssamgongan telur bara 1 mandat meira enn andstøðan. Fer Áron Vest so enntá í part við minnilutanum, gerst hann meiriluti, og harvið kann borgarstjórin fáa býráðsmeirilutan ímóti sær.

Tá tað er sagt, so er hetta mest av øllum ein hypotetisk støða, sum Sambandsflokkurin neyvan letur henda. Eitt nú kann Hermann Samuelsen siga pass til Løgtingið, og so kemur Haraldur R. Hammer á ting fyri hann. Ella Sambandsflokkurin kann siga, at tey gera undantak og loyva dupultmandati í hesum føri. Men heldur flokkurin fast um, at dupultmandat ikki skulu koma fyri, so standa vit altso í omanfyrinevndu margháttligu støðu. 

Tað verður í øllum førum spennandi at fylgja við í.