Hyggja vit eftir teimum 57 valstøðunum, so var áhugavert at síggja, hvar flokkarnir stóu seg best. Á nógv størsta valstaðnum, sum er í Tórshavn, er upplagt at flokkarnir fáa flestar atkvøður, og tað var tað eisini hjá Sambandsflokkinum, Javnaðarflokkinum, Tjóðveldi, Framsókn og Miðflokkinum. Men hjá Fólkaflokkinum og Sjálvstýri komu flestar atkvøður í Klaksvík.

Hyggja vit so eftir, á hvørjum valstaði flokkarnir stóu seg lutfalsliga best, so spælir søgan nógv inn hjá nógvum flokkum. Har sum flokkarnir søguliga sæð langt aftur í tíðina hava staðið seg best er støðan ofta tann sama val eftir, hóst tað í prosentum og atkvøðum skiftir nakað frá val til val. Tað nógv størsta lutfallið hjá nøkrum flokki hetta valið var á Viðareiði, har heili 72,6 % valdu Fólkaflokkin. Toppskjútti var Beinir Johannesen við 67 atkvøðum. Sambandsháborgin var ikki óvæntað á Toftum, har Atli F. Johansen var toppskjútti við 277 atkvøðum, meðan javnaðarháborgin ikki óvæntað var á Tvøroyri, har Bjarni Hammer var toppskjútti við 345 atkvøðum.

Sjálvstýrisháborgin var á Kirkjum, har 30,8 % valdu Sjálvstýri. Toppskjútti var Sylvia Thomsen við fýra atkvøðum. Hóast Sjálvstýri ikki hevur sitið á tingi, so hevur flokkurin varðveitt sína stóru undirtøku á valstaðnum á Kirkju. Á løgtingsvalinum í 1998 (60 %), 2002 (40,9 %), 2004 (40,9 %), 2008 (50 %), 2011 (44,4 %), 2015 (43,5 %) 2019 (27,3 %) og 2022 (28,6 %) var Sjálvstýri sum oftast størsti flokkur á Kirkju eins og flokkurin var hesaferð. Sjálsvtýri var eisini størsti flokkur á Kirkju í 1994, 1990, 1988, 1980, 1974, 1970, 1962, 1958, 1954, 1950, 1945, 1943, 1940, 1936, 1932. Í 1932 var Kirkja á fyrsta sinni eitt valstað fyri seg.

Tjóðveldisháborgin var á Velbastað, har Bjørg Brynhildardóttir Egholm var toppskjútti við 17 atkvøðum, meðan Framsóknarháborgin var í Nólsoy, har Karlot Hergeirsson var toppskjútti við 43 atkvøðum. Miðflokkaháborgin var í Svínoy, har Petur Asano var toppskjútti við seks atkvøðum. Hetta er fyrstu ferð nakrantíð, at Miðflokkurin er størsti flokkur í Svínoy.