Í nátt er tað farið eysturum, og so fara vit at fáa kaldari luft av útnyrðingi. Áðrenn tað næsta kemur, fer ein hátrýstryggur við lítlum vindi at leggja seg yvir okkara leiðir eina løtu, áðrenn alt endurtekur seg leygarkvøldið við útsynningi ella suðurætt og ælaveðri.  

Tað er frískur vindur upp í hvassan vind av útsynningi í dag, 10 til 15 m/s, skiftandi skýloft og ælaveður, stundum grov æl, í støðum vátakavi ella heglingur. Í kvøld veksur hann upp í strúk í vindi upp í skrið, 13 til 18 m/s. Út á kvøldið gongur vindurin upp í vestan, og vindurin minkar niður í frískan vind ella strúk, 8 til 13 m/s. Hann fer at liggja vestaneftir í nátt, meira vindur sunnanfyri enn norðanfyri – 5 til 10 m/s, norðanfyri; 10 til 15 m/s sunnanfyri. Framvegis skiftandi skýloft og ælaveður, møguliga við vátakava. Hitin 2 til 6 stig, í hæddunum niður móti frostmarkinum.

Fyrrapartin í morgin er frískur vindur upp í hvassan vind av útnyrðingi, 10 til 15 m/s, men sum frá líður veksur hann upp í hvassan vind ella skrið, 15 til 20 m/s. Skiftandi skýloft og ælaveður, í støðum vátakavi.

Seint seinnapartin minkar hann niður í lot til frískt lot, 3 til 8 m/s. Út á kvøldið gongur hann niður í útsynning, tað verður hálvskýggjað og bert okkurt ælið. Um náttina frískur vindur upp í hvassan vind sunnan, 10 til 15 m/s, í støðum upp í skrið, 20 m/s, ádrigið og fram ímóti morgni fer at regna. Hitin 2 til 6 stig, um náttina niður ímóti frostmarkinum.

Sunnudagin er frískur vindur upp í hvassan vind vestan, 10 til 15 m/s, samdrigið og regn ella kavi. Um náttina veksur hann upp í hvassan vind ella skrið, 15 til 20 m/s, men enn samdrigið og regn ella kavi. Hitin 3 til 7 stig.

Gott vikuskifti.