Kristian Eli Zachariasen hevur viðmerkt greinina, sum vit skrivaðu fyrr í dag, har tølini siga, at Sjálvstýrisháborgin í 2026 er á Kirkju, um vit hyggja eftir, hvar flokkarnir stóu seg lutfalsliga best. Á valstaðnum á Kirkju á Fugloynni var Sjálvstýri størsti flokkur og tað hevur hann næstan altíð verið søguliga sæð.

Kristian Eli, ið er sonur Álv Zachariasen og sum í fleiri umførum hevur sitið í Klakvíkar býráð fyri Sjálvstýrisflokkin, skrivar soleiðis:

Sjálvstýrisháborgin er á Kirkju, skrivar Norðlýsið.

Tað er kanska ikki óvæntað, at Kirkjufólk eru so trúføst móti Sjálvstýrisflokkinum. Flokkurin hevur djúpar røtur á Kirkju og hevur flokkurin verið umboðarður við landstýris- og løgtingsfólkum, sum hava ættarbond til Kirkju, millum annað fødd á Kirkju. Út frá Løgtingssøguni bind 1-3 havi eg samansett niðanfyri standandi tekst.

Zachariasen ættin av Kirkju í føroyskum politikki

Zachariasen ættin hevur havt ein týðandi leiklut í føroyskum politikki, serliga í sambandi við Sjálvstýrisflokkin. Trý nøvn standa serliga fram: Louis Christian Oliver Zachariasen, Símun Petur Zachariasen og Álvur Zachariasen, sum umboða ymisk ættarlið og tíðarbil í føroyskum politikki.

Louis Zachariasen – lærari, rithøvundur og landsstýrismaður

Louis Christian Oliver Zachariasen (1890–1960) var ein av mest markantu føroysku politikarunum í miðjuni av 20. øld. Hann varð føddur á Kirkju og búsettist seinni í Tórshavn. Hann hevði bæði læraraútbúgving og verkfrøðingsútbúgving og starvaðist m.a. sum lærari og seinni sum stjóri á Telefonverki Føroya Løgtings frá 1936 til 1952.

Politiskur var hann knýttur at Sjálvstýrisflokkinum og sat á Løgtingi í tíðarskeiðunum 1940–1943 og 1946–1950. Í 1946 stillaði Sjálvstýrisflokkurin upp saman við Javnaðarflokkinum, og Louis Zachariasen varð tí valdur á javnaðarlista. Frá 1948 til 1950 var hann landsstýrismaður.

Umframt politiska virksemið var hann virkin sum rithøvundur og skrivaði fleiri bøkur um føroyska søgu og samfelag, harímillum Føroyar sum rættarsamfelag og Á leiðini. Hann hevði eisini leiklut í politiskum spurningum undir seinna heimsbardaga, m.a. í sambandi við føroyska flaggið.

Símun Petur Zachariasen – tingmaður í broytingartíð

Símun Petur Zachariasen (føddur 1887) var eisini tingmaður fyri Sjálvstýrisflokkin og virkaði í einum tíðarskeiði, har føroyskur politikkur var í stórum broytingum. Hann sat á Løgtingi m.a. í 1946 og 1950. Louis og Símun Petur vóru beiggjar. Símun Petur Zachariasen var eisini virkin sum rithøvundur og yrkjari. Millum annað yrkti Símun Petur, Várlongsul.

Í 1946 var hann partur av valsamstarvi millum Sjálvstýrisflokkin og Javnaðarflokkin, og eins og Louis Zachariasen varð hann valdur á javnaðarlista. Hetta vísir, hvussu flokkspolitikkur í Føroyum í hesum tíðum kundi vera meira samansettur og samstarvsgrundaður enn nú.

Símun Petur Zachariasen var pápi Álv Zachariasen og sostatt partur av eini politiskari ætt, sum rakk yvir fleiri ættarlið.

Álvur Zachariasen – seinni ættarlið

Álvur Zachariasen (føddur 1931) umboðaði eitt seinni ættarlið í føroyskum politikki. Hann varð valdur á Løgting í tíðarskeiðinum 1994–1998 fyri Sjálvstýrisflokkin í Norðoya valdømi.

Hann hevði útbúgving sum skipsførari og starvaðist bæði í sjóvinnuni og sum lærari á Klaksvíkar Sjómansskúla. Umframt landspolitikk hevði hann eisini drúgva kommunalar royndir, m.a. sum limur í Klaksvíkar býráð frá 1980 til 1997.

Ein politisk ætt

Samanlagt vísa hesir tríggir politikararnir ein greiðan ættar- og politiskan samanhang í føroyskum samfelagslívi. Frá Símuni Peturi og Louis Zachariasen í miðjuni av øldini til Álvur Zachariasen í seinnu øldini sæst ein samanhangandi luttøka í føroyskum politikki.

Felags fyri teir allar er tilknýtið til Sjálvstýrisflokkin og ein virkin leiklutur í bæði politiskum og samfelagsligum viðurskiftum í Føroyum. Teir eru dømi um, hvussu politisk siðvenja og áhugi kunnu ganga í arv og seta dám á føroyskt politiskt lív í fleiri ættarlið.