Veðrið í vikuni
Umleypandi veður hesa vikuna, men tað eru vit so von við. Tó ikki líka langt hvønn vegin sum í farnu viku. Ringasta veðrið fer at vera í byrjanini av vikuni, men so batnar spakuliga.
Mynstrið við einum lágtrýsti fyri og øðrum eftir, sum fara eystureftir beint norðanfyri, fer at broytast í vikuni. Tey fara ikki at ganga líka nær við okkum – undantikið tað sum er beint norðanfyri í kvøld og í nátt. Hátrýstryggirnir, sum stinga seg upp ímillum lágtrýstini, fara at vera eitt sindur drúgvari, enn vit hava verið von við seinastu vikurnar.
Hann fer fyri tað mesta at liggja av útnyrðingi niður í útsynning, men onkra løtu av landsynningi ella av ymsum ættum.
Veðrið í vikuni – dag fyri dag:
Mánadagin:
Heilt fitt av vindi fyrrapartin av útnyrðingi, 13 til 18 m/s, í støðum upp í 20 m/s. Tað er skrið og upp í móti stormi. Loftið skýggjað við sólglottum og ælaveðri, í støðum vátakavi. Seinnapartin minkar vindurin niður í 8 til 13 m/s, og um kvøldið gongur hann niður í vestan og minkar vindin niður í 5 til 10 m/s, meðan tað er samdrigið og okkurt ælið. Um náttina fer hann í útsynning. Hitin millum 3 og 8 stig.
Týsdagin:
Nakað av vindi fyrrapartin av útnyrðingi, men ikki líka nógv sum dagin fyri, 8 til 13 m/s, í støðum upp í hvassan vind, 15 m/s. Seinnapartin fer hann í vestan og minkar vindurin niður í 5 til 10 m/s, samdrigið loft og regn. Hitin millum 4 og 9 stig, men um náttina niður í frostmarkið.
Mikudagin:
Dagurin byrjar við minni vindi enn dagarnar áðrenn, vesturætt, 8 til 13 m/s, smáskýggjað og okkurt ælið. Um náttina minkar vindurin niður í 5 m/s ella minni, hálvskýggjað og yvirhøvur turt. Hitin millum 1 og 6 stig, um náttina 2 stig niður um frostmarkið.
Hósdagin:
Dagurin byrjar við einum lítlum loti av ymsum ættum, minni enn 5 m/s, sum frá líður leggur hann seg í landsynning og veksur upp í 10 til 15 m/s. Um náttina gongur hann vesturum í útsynning og minkar vindin niður í 3 til 8 m/s, meðan tað er hálvskýggjað og yvirhøvur turt, tó sum frá líður ælaveður. Hitin millum 2 og 7 stig, um náttina niður í frostmarkið.
Fríggjadagin:
Dagurin í vikuni við minsta vindinum, 3 til 8 m/s av útsynningi, sum frá líður minkar niður um 5 m/s av ymsum ættum. Hálvskýggjað og ælaveður. Hitin úr frostmarkinum upp í 5 stig, um náttina niður í 2 kuldastig.