Tá ið stórar ætlanir gerast til veruleika, er tað ofta tí, at nøkur fólk tora at síggja longur enn dagin í dag

Tað er ein heiður og eitt stórt privilegium fyri Klaksvík at hava fyritøkuna Christian í Grótinum í býnum. Ættin hjá Kristiani Martin Rasmussen er ein familja av slóðbrótandi visiónerum kappum við stórum alski til býin. Fyritøkan sær, hvat býnum tørvar, og ger nakað við tað – og tað í ovurmát.

Í skaldsøguni ”Tá ið eg havi málað summarhúsið” eftir Oddvør Johansen frá 2002, sum gongur fyri seg undir fíggjarkreppuni í nítiárunum, stendur á síðu 111: ”[I]nn eftir Pollinum stevnir tann fyrsti flaggskrýddi nýbygningurin í tíggju ár, Christian í Grótinum. Við hesum trolaranum hava norðoyingar aftur reist seg úr øskuni og síggja nýggjan dag rísa í eystri. [...] Teir [føroyingar] ætla at svara hvørjum sítt.” og harvið setti Christian í Grótinum punktum fyri elendigheitini í 90’unum.

Í hesum døgum letur glæsiliga KG Hotel dyrnar upp. Uppkallað eftir havnarkenningarmerkinum hjá Klaksvík og teimum skipum, sum í fleiri ættarlið hava borið býin fram. Ikki minst Rasmussen-ættin. Hotellið er staðsett á fremstu parkett í Klaksvík, og tað hevur heilt víst gjørt sítt til, at hotellið er bygt so flott og snøgt sum møguligt, og minnir tað nú um operahúsini í Keypmannahavn og Sydney ella Hørpuna í Reykjavík. Ein framúr sjón frá marina’ini í Klaksvík, har býurin bjóðar siglandi og vitjandi vælkomnum.

Fyri føroyingar og ferðafólk verður KG eitt trekkplástur, meðan fyri klaksvíkingar verður tað ein frístaður; eitt kærkomið avbrot í gerandisdegnum, har okkum ikki longur nýtist at droyma okkum burtur ella ferðast langvegis til hotell í heimsflokki. Við KG hava vit fingið tað í gongufrástøðu. Bygt í Føroyum. Rótfest í Klaksvík. Opið fyri heiminum. Tøkk skulu tit hava fyri tað.