Norðlýsið setti Sannu Svarvadal stevnu undan oddadystinum í Meistaradeildini í annaðkvøld. Vit spurdu hvussu kvinnurnar fyrireika seg til dystin:

- Vit eru spentar til dystin í annaðkvøld. Vit hava fyrireikað okkum væl til dystin. 10 leikarar í hópinum hava verið burturstaddar við landsliðnum seinastu tíðina. Hesa vikuna hava vit verið savnaðar aftur í Kí-hópinum og hava hugsavnað okkum um føroysku kappingina og arbeitt við teimum taktisku prinsippunum, sum vit skulu út at fremja á vøllinum, sigur Sanna.

- Vónirnar eru góðar. Seinast vit møttu HH, endaði dysturin við javnleiki, har vit leikliga vóru omaná, hóast vit ikki vóru heilt nøgdar við okkara avrik hendan dagin, sigur liðskiparin.

- Hesaferð skulu vit verða tryggari á bóltinum og standa sterkari í verjustøðu, og vit hava góðar vónir um, at hetta fer at eydnast okkum væl til dystin í morgin, sigur Svanna. 

- Vit hava ein breiðan og sterkan hóp, sum er væl fyri, og allir leikararnir eru klárir til dystin í morgin, so vit eru væl fyrireikaðar og hava góðar vónir, sigur Svanna Svarvadal við Norðlýsið at enda.