Í samgonguskjalinum hjá fráfarna landsstýri stóð, at eftirløn skal veitast fyritíðarpensjónistum.  Áhugabólkur Pensjónista fer við hesum at heita á samgonguflokkarnar at syrgja fyri, at hetta lyfti kemur við í samgonguskjalið og verður hildið í komandi samgonguskeiði.

Seinasta árið hevur Áhugabólkur Pensjónista viðgjørt fleiri pensjónsmál/almannamál saman við løgtingslimum úr fleiri politiskum flokkum umframt við landsstýrismannin í almannamálum og landsstýriskvinnuna í fíggjarmálum.

Mál, ið partarnir hava viðgjørt, eru m.a. at

• mótrokningin í fólkapensjónini má hækkast úr 69.100 kr. uppí 102.600 kr.
• Mótrokningin í pensjónini eigur at verða stigvíst hækkandi, soleiðis at pensjónistar við lágari inntøku verða linari mótroknaðir enn høgtløntir pensjónistar
• Pensjónirnar eru afturútsigldar og mugu hækkast heilt munandi
• Fyritíðar- og fólkapensjónistar mugu fáa somu krónuupphædd í árligari pensjónshækkan sum fakfeløgini á almenna arbeiðsmarknaðinu
• Fátækraraktir fyritíðar- og fólkapensjónistar, eiga at fáa eina eykaviðbót afturat pensjónini. Pensjónistar í vælferðarsamfelagnum Føroyum eiga ikki at liva í fátækradømi.

Hesi mál og aðrir batar til frama fyri korini hjá pensjónistum eiga at verða fingin í rættlag í komandi samgonguskeiði.

Áhugabólkur Pensjónista