Í Fólkaflokkinum eru 27 atkvøður millum Grím Sundstein og Fíu Nielsen, og so mikið kann ikki vera talt skeivt í upprunaligu uppteljingini. Tað kann tað heldur ikki í Javnaðarflokkinum, har 100 atkvøður eru millum ytsta mandat, Margit Stórá, og fyrsta varafólk, Bjørt Lind, og so als ikki í sjálvstýri, har yvir 300 atkvøður skilja Sámal Petur í Grund frá fyrsta varafólki, Sylviu Thomsen. Tað fer heldur ikki at henda, at fínteljingin broytir nakað í Framsókn, har 110 atkvøður eru ímillum Bjarna Kárason og Beintu Løwe, ella í Miðflokkinum, har 165 atkvøður eru á muni millum Jenis av Rana og Sámal Hanna Lognberg.

Men í Sambandsflokkinum og Tjóðveldi kann fínteljingin geva útslag. Har eru nevniliga bert 3 atkvøður ímillum ytsta mandat og fyrsta varafólk. Johan Dahl fekk 345 atkvøður undir fyrstu uppteljing, og harvið fekk hann 7. og seinasta mandatið hjá Sambandsflokkinum. Magni Højgaard á 8. plássi fekk 342 atkvøður. Og í Tjóðveldi fekk Jóhan Christiansen 307 atkvøður og var innanfyri, meðan Eirikur í Jákupsstovu fekk 304 og endaði sum tann fyrsti uttanfyri.

Skuldi tað hent seg, at ABC-samgongan ikki gjørdist ein realitetur, og at Tjóðveldi í staðin slapp í Landsstýrið við 2 limum úr tingmanningini, so kann fínteljingin eisini flyta, hvør aftaná føstu varafólkini gerst fyrsta varafólkið har. Bert 1 atkvøða skilir Erling Eidesgaard við 231 frá Tjóðhild Patursson við 230.