Nú er greitt, hvussu leikskráin í meistaradeildini hjá monnum í 2026 fer at síggja út. Lagt verður fyri á Argjum fríggjakvøldið 6. mars tá AB fær vitjan av B68. Hinir fýra dystirnir í fyrsta umfari verða spældir sunnudagin 8. mars.

Um góðan hálvanannan mánað, leygardagin 28. februar fer bólturin á rull aftur. Ársins fyrsti dystur verður Lions Stórsteypadysturin, sum í ár er millum KÍ, sum í fjør vann greipuna, og HB, ið gjørdist nummar 2 í landskappingini.

Vikuskiftið aftaná verður hol sett á Meistaradeildina hjá monnum, sum í ár verður sparkað í gongd inni í Vika á Argjum. Fyrsti dystur verður fríggjakvøldið 6. mars tá AB, sum flutti upp farna kappingarár, tekur ímóti B68.

Hinir fýra dystirnir í 1. umfari verða spældir sunnudagin 8. mars., og tá møtast liðini soleiðis: B36 – EB/Streymur, NSÍ – Víkingur, 07 Vestur – KÍ og Skála – HB.

Síðsta umfar fyri summarsteðgin er á skránni fyrsta vikuskiftið í juli, og síðani verður tørnað til aftur fyrst í august.

Meistaradeildin hjá monnum endar leygardagin 31. oktobur, og tá eru dystirnir hesir: HB – B36, KÍ – Víkingur, AB – 07 Vestur, B68 – NSÍ og EB/Streymur – Skála.

Øll leikskráin sæst her: Meistaradeildin menn 2026

Fyrsta umfar í kappingini um Løgmanssteypið verður spælt 15. og 16. apríl, fjórðingsfinalurnar eru á skránni 29. og 30. apríl, og hálvfinalurnar verða spældar 13. og 14. mai og 24. og 25. juni. Finalan um Løgmanssteypið verður á Tórsvølli leygardagin 5. septembur.