Ítøkiliga reisir Bogi prinsipiella spurningin: “Eg loyvi mær, at seta spurnartekin við, um tað yvirhøvur er eitt gott hugskot, at hava eitt mál fyri, at øll elframleiðsla skal verða grøn.” Bogi er ikki hvør sum helst, tá umræður grøna orkuskiftið, tí sum adjungeraður professari í orkufrøði á Setrinum er Bogi ein nógv brúktur serfrøðingur. Eitt nú var Bogi limur í arbeiðsbólki, sum myndugleikarnir settu at orða tilmælir til marknaðarskipan á orkuøkinum. Eisini er Bogi nýliga valdur sum formaður í nevndunum fyri vindmyllufeløgini hjá SEV.

Í uppslagnum leggur Bogi dent á, at myndugleikarnir eiga at hava høgar ambitiónir um einar grønar Føroyar. Men tað er “tó umráðandi, at grøna umleggingin verður gjørd á rættan hátt”.

Sambært Boga er rætti hátrurin at lata oljuorku framvegis taka sær av seinastu 20%, tí tað er alt ov dýrt at røkka 100% í 2030: “Tað er tí skilabest, at lata elnetið liggja í eini økonomiskari javnvág, har man loyvir seinastu 20% at koma frá olju, meðan hini 80% koma frá grønum keldum.”

Heldur skulu myndugleikarnir sambært Boga hugsavna seg um uppgávuna at elektrifisera alla orkunýtsluna. “Hetta krevur sjálvsagt útbyggingar á framleiðslusíðuni við vindi og sól, men hesar skulu ganga hond í hond við økingina á nýtslusíðuni.”

Tá tað málið er nátt, kunnu myndugleikarnir aftur fara at “arbeiða við, at øll elframleiðsla verður grøn.”