Grønlendska drotningin møtir føroysku stjørnuni

Á síðstu oyggjaleikunum á Guernsey fyri tveimum árum síðani vann Sara á Miriam í hálvfinaluni í einmansleiki, har Sara eftirfylgjandi streyk avstað við gullinum í einstaklingakappingini. Sara er veruliga drotningin av badminton í Grønlandi, sum eisini hevur drúgvar royndir í altjóða høpi. Hinvegin er Miriam unga stjørna okkara við fýra FM gullmedaljum og fleiri altjóða dystum seinnu árini. Á rankinglistanum hjá BWF liggja tær báðar næstan javnar, har Miriam tó hevur munin sum nummar 808 ímóti Sara á 821 í einmansleiki.

Toke koppaði landsstýrisformanninum

Toke luttók ikki á oyggjaleikunum á Guernsey vegna skaða, tí verður hetta fyrstu ferð, at Rúni spælir ímóti honum á oyggjaleikum. Toke hevur verið grønlendskur meistari í einmansleiki síðstu trý árini, har hann í fjør vann á Jens-Frederik Nielsen, sum í dag er landsstýrisformaður í Grønlandi. Jens-Frederik vann gull á Guernsey. Rúni gjørdist føroyameistari í einmansleiki í 2025. Í liðkappingini fyrr í vikuni vann Grønland gull, har tey bæði Sara og Toke vunnu dystirnar í einmansleiki. Nú vóna vit, at Miriam og Rúni klára at sifta grønlendsku badmintonleikarunum í finalunum í einstaklingakappingini.