Inni í Spaniastuvu eru skipaðir størri og smærri klivar, sum umboða eina roykstovu, glasstovu, fjós og so ein við post-søguni. Eisini stendur ein tristur, sum Jákup bónda hevur smíðað, inni her.

Tað er Edward Fuglø, sum hevur lagt framsýningarhølið til rættis, saman við Andras Sólstein, savnsvørði og Helenu K. Sundsskarð, forkvinna í sjálvsognarstovninum Norðoya Fornminnasavn - Ein søgulig bygd við lutum, sum lýsa gerandisdagin í Føroyum í gomlum døgum.

Málið varð at verða liðug til Norðoyastevnu og at hava dyrnar opnar á Norðoyastevnu so fólk kunnu síggja nýggju snotiligu og spennandi umstøðurnar á Fornminnasavninum.

Tá ið hetta nú eydnaðist, varð býráðið boðið á gátt í dag at síggja framsýningina og hoyra frágreiðingar um hana.

Borgarstjórin, Karl H. Johansen møtti fystur upp og við honum á baki, Signhild V. Johannesen, Anfinn í Toft, Sylvia Thomsen, og Myldrid á Lógv. Tey vóru øll sannførd um at hetta var ein hugtakandi framsýning, sum lyftið savnið munandi.

Boðin var ein kaffimunnur við bestu køkum, sum rættiliga fekk prátið á glið, og høvdu tey øll nógv uppá hjarta, hvør í sínum lagi.

Helenu K. Sundsskarð, segði m.a. í stuttari vælkomurøðu: Ein býur við so sterkum samleika og søguligum týdningi eigur at hava eitt stað, har søgan verður varðveitt og miðlað. Eitt savn er ikki bara fortíð. Tað er eisini samtíð og framtíð - eins og tað er eitt lærustað, mentanarvøllur og ein inspiratiónskelda.

Í Miðstovuni er eisini ein framsýning, tey kalla “Sildarok”, sum varpar ljós á sildatíðina og lýsir virksemið, sum fór fram í Handilshúsinum úti í Klaksvík. 

Á Norðoyastevnu er savnið opið:
Fríggjadagin kl. 11.00 – 15.00
Leygardagin kl. 10.00 – 14.00