NSÍ vitjar í Klaksvík á norðoyastevnu í kanska mest avgerandi dystinum í kappingini higartil.

Leygarkvøldið kl. 19.00, beint eftir kappróðurin, verður toppdystur við Djúpumýrar millum KÍ-NSÍ. Hetta eru tey bæði klárt bestu liðini í ár, og tá blaðið fór til prentingar, var KÍ eitt stig frammanfyri. Undir øllum umstøðum verður tað dystur millum nummar eitt og tvey.

KÍ vann í Runavík

Liðini hava spælt ein innanhýsis dyst í hesum kappingarárinum. Frammanfyri sera stórari áskoðarafjøld vann KÍ tepran 2-1 sigur í Runavík, har sigursmálið kom móti endanum av dystinum. Veðrið var ikki tað besta, og tað ávirkaði helst dystin. Men liðini løgdu sera nógv fyri, og tí bleiv undirhaldið gott. Smáir marginalar gjørdu, at KÍ vann dystin, tí útfrá málmøguleikum kundi tað tað sama verið NSÍ, sum vann dystin. Men KÍ var meira avgjørt, tá møguleikarnir komu tann dagin.

Avgerandi dystur

Sum kappingin hevur verið í ár, so seta topp 2 liðini fá stig til og heldur tann gongdin fram, so verður talan um ein avgerandi dyst, tí eftir hetta skulu vit til 27. umfar fyri at finna síðsta innanhýsis dystin millum hesi bæði liðini. Tá kann alt verða avgjørt, men møguleikin fyri einari FM-finalu á síðsta leikdegi eins og í 2019, er avgjørt til staðar eisini. KÍ vann fyrsta innanhýsis dystin millum liðini, men KÍ var eisini fyrst at seta stig til móti øðrum liðum, tá KÍ spældi javnt móti HB. Vinnarin leygarkvøldið tekur eitt fet móti FM 2025, hóast nógv umfør eru eftir.