Nógv áhugaverd mál á býráðsfundi
Á býráðsfundinum í Klaksvíkar Býráði í kvøld, mánakvøldið 28. apríl, eru fleiri áhugaverd mál, harav eitt man vera endurskoðanin av fíggjarætlanini fyri 2025. Eisini verður lendisarbeiði við Ósánna og við Húsarhaldsskúlan á skrá, eins og tað altíð kenslusama við navngeving av vegastrekkjum. Og so eru dulnevnd tilboð uppá íbúðarverkætlan niðan Horn eisini á skrá.
Í endurskoðanini av fíggjarætlanini er tað ikki heilt greitt, júst hví tað er neyðugt við eini endurskoðan. Har stendur bert, ”at avsetingarnar í fíggjarætlanin í fleiri førum [eru] ov teprar”, og bendir tað á, at ov lítið er sett av. Og tað verður undirstrikað av setninginum um endamálið við endurskoðanini, ið er, at ”tryggja, at fíggjarætlanin fyri 2025 er realistisk og í samsvari við veruligu inntøkur og útreiðslur”. Eftir hesum at døma heldur skribenturin, at undanfarna fíggjarætlan ikki hevur verið realistisk ella í samsvari við veruligu inntøkurnar og útreiðslurnar. Heilt víst eitt spennandi mál. Fólkaflokkurin í Fíggjarnevndini tekur ikki undir við málinum, meðan býráðssamgongan ger.
Parkeringspláss, uttanumøki, Ósáin og Húsarhaldsskúlin
Eins høgt fara bylgjurnar neyvan at ganga í málinum um uttanumøkið við Ósánna og Húsarhaldsskúlan, har nevnirnar, sum eru inn yvir málið, sum heild eru positivar, men peningur írestar. Parkeringsplássið á økinum er mett at kosta 2 milliónir, og so er ongin fígging til tað, sum ein kostnaðarmeting áljóðandi 3,1 mió. er gjørd um. Tekniska fyrisitingin sigur, at verkætlanin verður framd í 2025, tí hon ikki tolir at bíða, og tað verður viðmerkt, at málið skal samtykkjast tvær ferðir av býráðnum.
Dulnevnd uppskot ella ei?
Og so er eitt mál um møguliga íbúðarbygging niðan Horn. Har er spurningurin, sum støða skal takast til, um dómsnevnd og býráðið ikki skulu kenna eigaran av uppskotinum, fyrrenn best skikkaða loysnin er vald. Hetta er, sum vera man, ein prinsipiellur spurningurin og av tí sama verður áhugavert at fylgja við.
Stangatrøð
Hartil verður skotið upp at kalla ein av síðuvegunum til eldri ognir við Stangavegin fyri Stangatrøð. Her hava fleiri onnur uppskot sum skilst verið, harav okkurt var at navngeva vegin eftir eigaranum av teirri einu trøðni. Gøtunavnanevndin skjýtur tó Stangatrøð upp og grundgevur við, at tey helst vilja sleppa undan umljóði í bending (møguliga spøkir Snjallabjalla her?), og eisini við, at navnið Stangatrøð er felagsheiti og tí ikki tekur ein traðareigara fram um aðrar.
Býráðsfundurin byrjar kl. 17:30.