”Arbeiðsvikan verður stytt niður í 37 tímar. Trípartasamráðingar verða tiknar upp um at stytta arbeiðsvikuna við einum tíma annaðhvørt ár, til hon er komin niður á 37 tímar. Arbeiðsvikan verður skipað við lóg.”

Soleiðis stendur skrivað í samgonguskjalinum millum Javnaðarflokkin, Tjóðveldi og Framsókn frá 2022. Men nú valskeiðið fyrsta dagin kemur í helvt, er arbeiðið framvegis ongan veg komið, og tað gjørdist bert uppaftur truplari av, at arbeiðsgevararnir trektu seg úr arbeiðsbólkinum, sum skuldi finna semju um tað.

Kortini visti in.fo tann 13. august at siga, at Landsstýrið fer at leggja uppskot um at stytta arbeiðsvikuna fyri Løgtingið tíðliga í 2025.

Tann 13. september setti Beinir Johannesen so Ingilín D. Strøm fyrispurning um fíggjarligar avleiðingar av at stytta arbeiðsvikuna. Svarið var, at tað fór at kosta vinnulívinum 500 milliónir og almennu kassunum 280 milliónir, og so fingu land og kommunur nakað aftur í skatti. Landsstýriskvinnan segði, at hetta hevði Gjaldstovan gjørt eina yvirskipaða meting um, meðan Gjaldstovan segði seg onga meting hava gjørt. Tølini vóru teirra, og tey vóru røtt, men tikin úr øðrum samanhangi. Ein nokkso margháttlig støða, sum eisini fekk Beinir Johannesen at konkludera, at ”málið slett ikki er búgvið til støðutakan enn”. 

Fíggjarlógaruppskotið fyri 2025 stuðlar hesum, tí als onki verður nevnt í tí um útreiðslur av at stytta arbeiðsvikuna. Eru tølini uppá umleið trýkvarta milliard røtt, og tað skal gerast sum skrivað í samgonguskjalinum við 1-tíma stytting annaðhvørt ár, hevði tað merkt 250 milliónir minni fyrsta heila árið við 39-tíma arbeiðsviku.

Í undanfarna valskeiði legði Javnaðarflokkurin, sum tá sat í andstøðu, annars ikki færri enn tríggjar ferðir uppskot fram um at stytta arbeiðsvikuna niður í 37 tímar. Fyrstu ferð var í mars 2020, men Javnaðarflokkurin tók sjálvur tað málið aftur. Næstu ferð var í august 2020, men tað málið fall við 10 móti 16. Her kann nevnast, at bæði Ruth Vang og Bjarni Kárason Petersen úr Framsókn atkvøddu ímóti. Triðju ferð var í oktober 2021, og aftur, tá tað málið kom til atkvøðugreiðslu í 2022, atkvøddi Ruth Vang ímóti, og málið fall.

Tá Búskaparráðið kom við heystfrágreiðing síni 2. september í ár – 20 dagar eftir at in.fo bar tíðindini um, at stytta arbeiðsvikan skuldi fyri tingið komandi vár – segði Ruth Vang við Dag og viku, at um tað ikki komu aðrir bollar á súpanina, so legði hon møguliga frá sær sum landsstýriskvinna í fíggjarmálum. Tá ið sama Ruth Vang aftur var í Degi og viku 30. september í sambandi við framløguna av fíggjarlógaruppskotinum fyri 2025, segði hon, uttan at vera ítøkilig, at samgongan veruliga fer at taka nøkur tøk fyri fíggjarliga haldførinum.

Tað er tí ikki óhugsandi, at eitt av krøvunum frá Ruth Vang fyri at halda fram í landsstýrissamgonguni hevur verið, at stytta arbeiðsvikan varð syltað.