Vit eru sera fegin um at kunna avdúka vinnararnar av stuttsøgukappingini, ið gjørdust Hanna Højgaard og Lydia Didriksen. Vinnararnir fáa 8.000 kr. hvør og sleppa eisini at luttaka í norðurlendskum seminari við hinum rithøvundunum og forløgunum í vetur.

Hanna er úr Saltangará og starvast sum varaleiðari og økisnámsfrøðingur í dagrøktini í Klaksvík, har hon eisini er búsitandi. Hanna, ið er nýggj á føroyska bókmentapallinum, hevur bæði yrkt og skrivað stuttsøgur til vaksin í síni frítíð. “Eg tími ikki í skúla í dag” er hennara fyrsta stuttsøga til børn, og er samstundis fyrsta søga hjá Hannu, ið verður útgivin.

Lydia er úr Havn og er útbúgvin lærari og MA í føroyskum máli og bókmentum. Hon arbeiðir sum undirvísari og er partur av krabbatoyminum, sum er eitt samstarv millum Bókadeildina og Nám, ið ger lættlesibøkur. Lydia hevur drúgvar royndir sum rithøvundur og týðari, umframt at hava ritstjórnað lesibøkur til framhaldsdeild. “Nýggju húsini” er heitið á vinnandi barnastuttsøguni hjá Lydiu.

Vinnarasøgurnar báðar skriva seg inn í vandamál, sum øll kenna seg aftur í. Tær viðgera truplar støður og evni, ið fylla nógv í gerandisdegnum hjá børnum. Rithøvundarnir arbeiða ymiskt við evninum felagsskapi.

Allar søgurnar í norðurlendska stuttsøgusavninum verða týddar og útgivnar á øðrum norðurlendskum málum, umframt føroyskum. Savnið verður útgivið til komandi norðurlendska bókamessu í Göteborg í septembur 2025.

Vit ynskja Hannu og Lydiu hjartaliga til lukku við vinninginum!