Verturin legði út við at siga, at honum dámar ikki, at sæð verður niður á kappróðurin úr luftini. Um ein skal brúka dronur, so skulu tær vísa inn á síðuna, tí tað umráðandi er, at ein sær, hvør bátur er fremstur. Tað ber væl til við dronumyndum, sigur hann, men hann segði eisini, at ”Antin sær man frá útvarpsbátinum ella sløkkir man!”, áðrenn hann kastaði bóltin út til viðmerkjararnar.

Hjalmar Zachariassen tók undir: – ”Eg eri stak irriteraður inn á dronumyndir; bæði myndir, tá teir stima upp – um vit taka Útvarpsbátin, so er hann antin eitt lítið sindur aftanfyri ella eitt lítið sindur frammanfyri, tí tað er nokkso ringt hjá honum at vita, akkurát hvar hann skal vera. Tað merkir nakað av gitingum, og tað kann gera, at útvarpsmaðurin gailar tað upp við at siga, at ein bátur gongur so og so væl, hóast hann í veruleikanum bara stýrir upp [...] Men dronumyndir eru forferdiligar. Bestu myndirnar eru, tá man zoomar væl inn á 2-3 bátar, sum eru tættir í oddinum”.

Kristmund Petersen var hinvegin meira positivur mótvegis dronumyndum: – ”Eg haldi at dronumyndir kunnu vera deiligar. Man kundi væl gjørt meira burturúr, nú tøknin er so framkomin”. Her legði verturin afturat, at til internationala scollararógving sær man bæði ferð, tempo og linjur á sjónum/vatninum, og at føroyski kappróðurin er heldur konservativur”.  

Niðurstøðan í studio var, at um dronumyndir skulu brúkast, skulu tær ikki vera niður á bátarnar.

Nøglin kann hoyrast í fullum líki her.