Yvirhøvur gott veður í vikuni, sum stendur fyri framman. Sum veðurkortini eru í kvøld, fer hann ikki upp um 8 m/s. Heldur ikki nógv avfall – einki brúgvalag fer framvið – men ælaveður viðhvørt. Eisini hitalagið fer at vera støðugt, fer at liggja millum 8 og 13 stig. Hetta lýggja og veika luftrákið fer at hava mjørka við sær til nógv støð, serliga ímóti ættini.  

Taka vit eitt skjótt yvirlit yvir lágtrýst o.a., so fara tey at ganga ímóti Skotlandi alla vikuna, og vit fara at liggja norðan fyri tey. Tí fer hann at liggja av eystri niður ímóti suðuri fram til næsta vikuskifti.

Veðrið í vikuni – dag fyri dag:  

Mánadagin:

Lítið lot av ymsum ættum, minni enn 5 m/s, skýggjað og okkurt ælið, í støðum mjørki. Hitin 8 til 12 stig.

Týsdagin:

Lot til frískt lot eystan, 3 til 8 m/s, samdrigið og okkurt ælið, í støðum mjørki. Um kvøldið og um náttina lítið lot eystan, minni enn 5 m/s, samdrigið og ælaveður, í støðum mjørki. Hitin 9 til 13 stig.

Mikudagin:

Lítið lot til frískt lot av landsynningi og eystri, minni enn 8 m/s, samdrigið og stundum regn ella ælaveður, í støðum mjørki. Hitin 9 til 13 stig.

Hósdagin:

Lítið lot til frískt lot um eystan, minni enn 8 m/s, minkandi niður í lítið lot av ymsum ættum, minni enn 5 m/s, samdrigið og ælaveður, í støðum mjørki. Hitin 9 til 13 stig.

Fríggjadagin:

Lítið lot til frískt lot av útsynningi, minni enn 8 m/s, hálvskýggjað og okkurt ælið. Um kvøldið dregur á luftina. Hitin 9 til 13 stig.