Stríð um javnstøðu í Fólkaflokkinum
Elsebeth Mercedis Gunnleygsdóttur sigur við Kringvarpið, at hon hevur bjóðað seg fram sum landsstýriskvinna og eisini hevði væntað sær at fáa sessin, men at sessurin, hon hevði ætlað sær, fór til Jacob Vestergaard. Harvið gjørdist Fólkaflokkurin einasti samgonguflokkur við bert monnum í Landsstýrinum; nakað sum er harðliga átalað av Javnstøðunevndini og felagsskapinum Demokratia.
Og tað er ikki tí, at Elsebeth sjálv hevur valt løgtingssessin fram um. Orðarætt sigur hon:
– ”Sjálvandi hevði eg bjóðað meg fram sum landsstýriskvinna í vinnumálum og væntaði sjálvandi, at eg fekk landsstýrissess, havandi í huga, at eg hevði nógvar royndir og eri væl kvalificerað, umframt tað álit og tann dygga stuðulin, sum fólkið vísti mær til løgtingsvalið. Sessurin fór tó til Jacob Vestergaard. Tá hetta er sagt, fari eg at ynskja øllum Landsstýrinum og løgmanni hepna hond við arbeiðinum”.
Elsebeth Mercedis Gunnleygsdóttur skuldi í Kringvarpið í gjárkvøldið at tosa um javnstøðu, men fekk forfall.
Beinir Johannesen, formaður í Fólkaflokkinum og komandi løgmaður, segði fyrr um dagin, at tað verður kompenserað í Løgtinginum fyri vantandi javnstøðuna í Landsstýrinum, og sipar hann her til ”tungar” nevndarpostar, men tað var ikki nóg mikið at kyrra vøtnini.
Í komandi Landsstýri fara at sita 5 menn og 2 kvinnur. Kvinnuumboðanin verður tí 29% og endurspeglar ikki kvinnuumboðanina á Løgtingi, sum sambært Demokratia er 39%. Við trimum kvinnum av sjey hevði kvinnuumboðanin verið 43% og harvið rakt munandi nærri fólkavaldu umboðanini.