Fimm av seks flokkum hava gjørt breiða semju um at samráðast við donsku stjórnina um størri sjálvræði, serliga fyri at fáa betri handilsavtalur.

Í ár 2000 vóru fullveldissamráðingar millum Føroyar og Danmark. Tær førdu ikki á mál. Men búskaparliga endaðu tær kortini ikki í null. Ríkisveitingin varð skorin við einum triðingi – niður í 642 milliónir krónur. Veitingin bleiv síðani tann sama næstu 20 árini.

Í hesum samgonguskeiðnum er ríkisveitingin lækkað við 100 milliónum – niður í 542 milliónir. Og saman við øðrum veitingum eru samlaða árliga fíggingin úr danska statskassanum umleið 1 milliard krónur.

Løgmaður hevur meldað greitt út, at samgongan ynskir størri sjálvræði.

Og í kjakinum um størri sjálvræði fúka tølini um høvdi á okkum veljarum. Anna Falkenberg, fólkatingslimur fyri Sambandsflokkin, fekk onkran grafikara at snikka sær eina mynd til at leggja á Facebook, har hon gjørdi rokningina upp fyri fullveldi til 2,5 mia.kr. Anna metti soleiðis eyka rokningina til NATO fara at vera 1,4 mia.kr.

Erling Eidesgaard í Tjóðveldi var skjótur at svara Onnu aftur, har hann fýltist á, at Sambandsflokkurin pumpaði útreiðslurnar upp (eitt nú við hasum 1,4 mia.kr. til NATO) og “gloymdi”, at útflutningsinntøkurnar fara at økjast, tá Føroyar fáa fleiri handilsavtalur í lag sum fullveldi.

Í seinasta partinum av poddrøðini “Búskapur í øllum” verða búskaparligu avleiðingarnar av at gerast sjálvstøðugt land í einum ríkjafelagsskapi útgreinaðar. Tað er Johnny í Grótinum, formaður í Búskaparráðnum og útbúgvingarleiðari á Setrinum, sum viðger málið saman við undirritaða.

Poddurin kann hoyrast her.