”Góði kundi. Við hesum gera vit vart við broyting í viðskiftatreytunum hjá Effo. Broytingin hevur við sær, at Effo tilskilar sær rættin at steðga avtaluni um sjálvvirkandi oljuáfylling og hitatænastu, um kundin hevur fingið olju frá øðrum veitara enn Effo. Er Effo tín einasti oljuveitari, ávirkast títt hald ikki av hesum broytingunum. Dagførdu treytirnar koma í gildi um 30 dagar frá í dag. Kunna teg um nýggju viðskiftatreytirnar við at trýsta á leinkjuna niðanfyri”.

Soleiðis stendur í boðunum, ið hava fingið ilt í fólk, frá Effo. Hetta hendir stutt eftir, at aðrir orkuveitarar hava meldað seg á banan, og møguliga er tað hendan kappingin, sum ikki hóvar Effo, og sum tí hevur fingið oljurisan eftir føroyskum mátistokki upp á bakbeinini.

Í eini viðmerking til uppslag á Facebook um boðini frá Effo verður hetta samanborið við peningastovnarnar og víst á, at tað at man er kundi í einum banka ikki merkir, at man ikki kann fara inn í ein annan banka at biðja um eina bankatænastu fyri tað. Norðlýsinum kunnugt hevur tað higartil hvørki verið óvanligt ella óhoyrt heldur, at fólk hava keypt olju frá Effo og hitatænastu frá Magn ella øvugt.

So løgin boð, má sigast, og eftir reaktiónunum at døma eisini ein óheppin hóttan frá oljurisanum í Føroyum.