Í sending hjá FM1 frá Summar Festivalinum kundu nakrir av manningini hjá Ørvi longu staðfesta, at teir fara upp í 10-mannaførini at rógva í 2026. Tað verður í Havnar Róðrarfelag, men enn er ikki greitt hvørjum báti. Helst veldst um verandi meistarar á Havnarbátinum ætla at verja meistaraheitið. Gera teir tað, so verða tvey 10-mannafør hjá Havnar Róðrarfelag, ið vildi verið gleðiligt fyri føroyskan kappróður. Vit sóu hetta í KRF í 2024, tá Klaksvíkingur og Nólsoyar Páll kappaðust.

Teir á Ørvi søgdu í sendingini, at allir teir somu halda fram og so hava teir fingið tveir afturat, sum hava hjálpt til sum eykamenn í ár. Nú vilja teir royna seg millum vaksnu mennirnar í bestu deildini í kappróðri, sum teir tóku til.

Ørvur vann allar róðrarnar hjá mongu 8-mannaførunum í ár. Og harav vóru teir síðstu fýra sigrarnir í stórum stíli, so eingin ivi er um, at hendan manningin hoyrir heima í 10-mannaførum í 2026.

Teir eru skjótir úti við staðfestingini, tí ofta fara vit framvið ársskiftinum, áðrenn manningar endaliga boða frá, at bátarnir eru mannaðir og ofta koma síðstu menninir ikki uppá pláss fyrr enn væl er komið inní nýggja árið.