Gamla Slanga á Tvøroyri
Neyvan hevur betri siglari verið í Føroyum enn gamla Slanga hjá Mortensens handli á Tvøroyri, sigur Føroya siglingarsøga. Skonnartin førdi og toldi stór segl, tí hon hevði høgan blýkjøl, og nógvur vindur skuldi vera, áðrenn rep varð tikið niður.
Snake, sum skipið áður nevndist, var góð 20 tons og smíðað í 1845 í Douglas á bretsku oynni Man. Mynd: Tjóðsavnið.
Jóhan Mortensen úr Øravík (1816-79) legði í síni tíð støði undir størsta handils- og reiðaravirki her á landi. Hann setti seg niður á Stóratippinum á Tvøroyri í 1859 og bygdi sær sethús við krambúð í endanum umframt pakkhús beint niðanfyri oman móti sjónum.
Slangan, sum Jóhan Mortensen keypti úr Liverpool 7. juni 1875, var seinasta skipið, hann var við til at keypa. Jákup Mortensen, sonur hansara, førdi skonnartina til Føroya og kom á Trongisvág við henni jóansøkudag sama summarið.
Dánjal Thomsen, Sandingurin nevndur, tók stutt eftir við og førdi hana árið at enda. Í 1876 førdu Dion Emil í Puntabyrgi og Napoleon hjá Jóhan Mortenen hana.
Í 1879 fór Jógvan Thomasen, Kvívíks Jógvan nevndur, at føra Slanguna. Ikki minni enn tríggjar ferðir bjargaði hann bátsmanningum úr havsneyð vestan fyri Suðuroynna. Fyri hesi brøgd fekk hann heiðursmerki.
Aftan á Kvívíks Jógvan førdi Einar Berthelsen Slanguna, til hon um heystið 1896 varð seld til Íslands.