Tað er eitt hátrýst, sum stendur yvir Bretlandi, sum er atvoldin til veðrið. Tað fer at liggja har í dag og í morgin, so fer tað at ganga eystureftir. Eftir tað og restina av vikuni (vikuskiftið við Norðoyastevnu íroknað) fara lágtrýst sunnan fyri Ísland at mynda veðrið í Føroyum.

Ættin fer at liggja millum sunnan og útsynning, og okkurt brúgvalag við regni fer framvið. Hvussu veðrið fer at vera á Norðoyastevnu lata vit liggja til fríggjadagin . . . .  

Veðrið fram til vikuskiftið:  

Í dag og fram til á middegi í morgin:

Frískur vindur upp í strúk vestan, 8 til 13 m/s, sum seinnapartin minkar niður í frískt lot til frískan vind, 5 til 10 m/s. Loftið smá- ella hálvskýggjað og yvirhøvur turt. Fyrrapartin í morgin lot til frískt lot av útsynningi, 3 til 8 m/s, skýggjað við sólglottum og yvirhøvur turt. Hitin millum 7 og 12 stig.

Mikudagin:

Lítið lot til frískt lot vestan, lækkar hann niður í sunnan, minni enn 8 m/s, samdrigið og yvirhøvur turt. Um náttina regn í støðum. Hitin 7 til 12 stig.

Hósdagin:

Lítið lot til frískt lot millum landsynning og útsynning, minni enn 8 m/s, skiftandi skýloft, stundum við regni ella ælaveðri. Hitin 9 til 13 stig.

Fríggjadagin:

Lítið lot til frískt lot av ymsum ættum, minni enn 8 m/s, skýggjað ella samdrigið, stundum við regni ella ælaveðri. Hitin 9 til 14 stig.