Vit eru skelkað av hvussu fimleikarhøllin enn einaferð verður handfarin. Í valdystinum vóru øll so sára samd um, at fimleikarhøll skuldi raðfestast sum tað fyrsta, tá ið eitt nýtt býráð tók við.

Nú vit eru komin eitt gott ár inn í valskeiðið, hevur býráðsmeirilutin valt at bíða við filmleikarhøllini til 2036 – tað sigur tíðarætlanin.

Ivasamt um hon yvirhøvur kemur í 2036

Samlaða verkætlanin, sum býráðsmeirilutin arbeiðir við kostar í alt 361 mió. kr. har nýggj svimjihøll og umklæðingardeildir til ítróttarøki eisini eru partur av verkætlanini.

Tað er tó sera ivasamt, um tað ber til at gjøgnumføra alla hesa verkætlan fíggjarliga áðrenn 2036, tí vit vita, at eldraøkið, vegir, útstykkingar, kloakkir, dagstovnar, skúli og nógv annað eisini hevur stórar avbjóðingar, og ikki bara kann setast í bíðistøðu.

Tí eru vit bangin fyri, at fimleikarhøllin er longri vekk enn 2036.

Fimleikarhøll skal raðfestast nú!

Tað er týðiligt, at býráðsmeirilutin arbeiðir uttan mið og mál. Meirilutin leggur málið fyri við tilmæli um at raðfesta soleiðis, at fimleikarhøllin verður tað seinasta sum verður gjørt.

Nakrir limir í meirilutanum ynskja at taka lán og fara í gongd við verkætlanina og brúka 52 mió. kr. til eina inngongd til ítróttarøkið, og fylgja ætlanini um at útseta fimleikarhøllina til í fyrstalagi 2036. Aftaná at minnilutin hevur gjørt vart við sína støðu, hevur ein partur av meirilutanum sett ynski fram um at kanna eitt sindur meiri, áðrenn hendan verkætlan upp á 361 mió. kr. verður sett í gongd.

Vit fara á býráðsfundinum hósdagin, at mæla til, at 52 mió. kr. heldur verða settar av til eina fimleikarhøll enn eina inngongd!

Tað er einki minni enn rætt og rímiligt, nú felagið hevur bíða í alt ov langa tíð.

Vegna Fólkaflokkin

Jógvan Skorheim

Oddmar á Lakjuni

Eyðstein Poulsen

Fríðin Ziskason

Atli Justinussen