Sunnudagurin fer allur við vindi, eitt sindur meira vindur norðanfyri enn sunnanfyri. Men allastaðni nógvur vindur. Forsagnirnar fyri næstu viku eru heldur ikki serliga hugaligar, men tær lata vit liggja til sunnukvøldið.

Út á seinnapartin minkar hann vindin niður í frískan vind til strúk av útsynningi, 8 til 13 m/s, skiftandi skýloft og ælaveður. Í kvøld veksur vindurin upp aftur í frískan vind til hvassan vind, 10 til 15 m/s.

Hitin til í morgin ári millum 2 og 8 stig.

Í morgin er aftur útsynningur, frískur vindur upp í hvassan vind, 10 til 15 m/s, við skiftandi skýlofti og ælaveðri, í støðum vátakavi. Um kvøldið gongur hann niður í sunnan og veksur vindurin upp í strúk í vindi ella skrið, 13 til 18 m/s. Tað dregur á luftina og fer at regna. Um náttina gongur hann aftur í útsynning, og veksur vindurin upp í skrið ella storm, 18 til 23 m/s.

Hitin millum 3 og 8 stig.

Sunnudagin skrið ella stormur av útsynningi, 18 til 23 m/s, í støðum upp í hvassan storm, 25 m/s. Seinnapartin gongur hann upp í vestan og minkar vindurin spakuliga niður í hvassan vind ella skrið, 15 til 20 m/s. Mánanáttina minkar vindurin eitt spakuliga, meðan tað er skýggjað og regn ella ælaveður, í støðum vátakavi ella kavi.

Hitin millum 1 og 6 stig.

Gott vikuskifti.