Tí er neyðugt at hugsa nýtt og skapa skipanir, ið gera tað lættari hjá ungum at taka fyrsta stigið inn á búðstaðarmarknaðin. Í Miðflokkinum vilja vit seta sjóneykuna á loysnir, sum geva veruligan møguleika.

 
Ein slík loysn er at geva ungum í aldrinum 14–34 ár møguleika at stovna eina serliga uppsparingarkonto til bústaðarkeyp. Hetta hevði givið teimum eitt ítøkiligt amboð at savna eginpening yvir tíð, samstundis sum tað hevði eggjað teimum at spara upp frá ungum av – nakað, sum samsvarar væl við virðini hjá Miðflokkinum um ábyrgd og langtíðarhugsan.

Skipanin kundi verðið skipað soleiðis, at ein kundi seta upp til 25.000 krónur av um árið á kontuna. Tað serliga við hesum hevði verið, at 20% av tí upphædd, sum verður sett av, kundi dragast frá í skattinum. Tað merkir, at um ein sparir 25.000 krónur upp eitt ár, fær ein 5.000 krónur aftur í skattafrádrátti. Hetta er ein beinleiðis fíggjarligur fyrimunur, sum ger tað meira lokkandi og realistiskt at spara upp.

Í Miðflokkinum halda vit, at slík átøk gera ein veruligan mun. Skipanin hevði styrkt fíggjarliga støðið hjá ungum, tá tey einaferð ynskja at keypa bústað. Við einum størri eginpeningi gerst lættari at fáa lán, og rentan kann ofta gerast lægri. Samstundis læra ung at taka ábyrgd av egnari fíggjarstøðu og hugsa langtíðar.

Eisini hevði hetta havt jalig árin á samfelagið sum heild. Tá fleiri ung fáa møguleika at keypa bústað, styrkir tað stabilitetin á búðstaðarmarknaðinum og minkar um trýstið á leigumarknaðin. Hetta er í tráð við ynskið hjá Miðflokkinum um eitt sterkt og samhaldsfast samfelag, har familjur kunnu trívast.

Sjálvandi krevur ein slík skipan politiska raðfesting og fíggjarliga ábyrgd. Men í Miðflokkinum síggja vit hetta sum eina íløgu í framtíðina – bæði hjá tí einstaka og hjá samfelagnum.

At hjálpa ungum inn á búðstaðarmarknaðin er ikki bara ein spurningur um bústaðir; tað er ein spurningur um geva tykkum ábyrgd, tryggleika og møguleikar. Og júst hesum vilja vit arbeiða fyri.

Um vit ynskja eitt samfelag, har ung hava veruligan møguleika at byggja sítt lív upp, eiga vit at taka stig nú. Ein uppsparingarskipan við skattaligum fyrimunum er eitt einfalt, men munagott stig á rætta leið – og eitt mál, sum Miðflokkurin er klárur at arbeiða fyri, og sum vit hava í okkara valskrá.

 
Jann Johannesen
Miðflokkurin