Tað sum eg serliga legði til merkis var, at Tórður tvær ferðir segði, at standmyndin av Jógvan Waagstein stendur í Akursmørk, og Rani nevndi hetta eina ferð.

Staðið, har sum standmyndin av Jógvan Waagstein stendur, hevur ongantíð verið kallað Akursmørk, men frá gamlari tíð hevur tað verið kallað Yviri á Bø, sum fevndi um ein stóran part av bønum í Vági innangarðs ella meira neyvt Yviri á Grundum. Hetta, tí at tað í farnari tíð vóru toftir har eftir fornari búseting, møguliga elsta búsetingin á Eiðinum áðrenn fólk hava sett búgv í býlinginum í Vági og aðrastaðni við Eiðið. Hetta kom eisini til sjóndar, tá ið koyrivegur varð gjørdur úr Vági yvir á Biskupsstøð í 1950-60 árunum. Tá sást undir útgrevstrinum vøkur grótlaðing, líknandi sum eitt grótlagt gólv.

Fyri átta árum síðani gjørdi Klaksvíkar kommuna eina lund oman móti sama koyriveg, fram við Ósánni og nakað niðaneftir, júst á hesum staði Yviri á Grundum. Tá var hetta forna økið grivið upp, endavent og fornfrøðiliga oyðilagt, so tað í dag ikki ber til at staðfesta, hvørjar toftir hava verið har. 

Klaksvíkar kommuna navngav hetta økið Lundin á Akursmørk, hóast tað als ikki er í Akursmørk, men Yviri á Grundum. Akursmørk er nakað væl sunnari enn henda lundin er.

At nú fólk eru farin at kalla hetta staðið, Yviri á Grundum, fyri Akursmørk, má vera komið av tí, at Klaksvíkar kommuna hevur navngivið hetta staðið fyri Akursmørk, og soleiðis flutt navnið Akursmørk heilt oman móti koyrivegnum úr Vági yvir á Biskupsstøð.

Sostatt er tað Klaksvíkar kommuna, ið hevur valt at víðka og flutt heitið Akursmørk innangarðs, og sostatt fer navnið Yviri á Grundum í gloymskuna millum klaksvíksingar og føroyingar annars.

Jógvan Ravnsfjall