Í dag hevur Løgtingið triðju viðgerð av broytingini í MVG lógini, sum frítekur eplir, grønmeti og blæur fyri tey 25% í MVG. Á henda hátt ynskja politikararnir at lætta um hjá smábarnafamiljunum. Men sambært Johnny í Grótinum, búskaparfrøðingi, fer lógarbroytingin at gera meira skaða enn gagn.

Í samrøðuni vísir Johnny á, at frítøkan fyri MVG fer í miðal at geva hvørjum húski ein lætta á 100 krónur um mánaðin. Hinvegin fer frítøkan at skeikla val forbrúkarans og gera seg inn á ein tann mest effektiva mátan at fíggja almennu útreiðslurnar við.

Nýggj poddvarpsrøð á Norðlýsinum

Hetta greiðir hann frá í fyrsta poddinum í nýggjari poddvarpsrøð á Norðlýsinum undir heitinum “Búskapur í øllm”.

Búskapur er í elrokningini, sum tú rindar, uttan at hugsa um tað. Tað er í at velja millum bíligt pasta og føroysk eplir. Tað er í, nær tú tekur barsil, hvønn bil tú keypir, og um tú tekur avlýsingartrygd á ferðini ella ikki.

Men búskapur er eisini í politikki.

Tá fólkavaldu skulu raðfesta milliónir og milliardir, velja millum tunnil ella sjúkrahús, vælferðarøking ella sparingar.
Og búskapur er í tí, sum ikki sæst: Hvussu nógv halda vit frí? Hvussu nógv spara vit? Hvussu skipa vit samfelagið?

Vertur er Jóhann Lützen, blaðstjóri og samfelagsfrøðingur, sum tosar við búskaparfrøðingin Johnny í Grótinum um alt tað, sum vit ikki vita, at vit longu vita um búskap.

Fyrsti poddurin verður at hoyra her á Norðlýsinum seinni í dag.