Í sendingini ”Stjórnin” á FM1 vóru teir hinvegin alt annað enn kúrrir um málið, og tað varð hildið at vera heilt margháttligt, at føroyska uttanríkisráðfrúgvin og forkvinnan í Tjóðveldi, møtir upp til fundar í Uttanlandsnevndini saman við Politiets Efterretningtjeneste, stytt PET, ið er danska fregnartænastan. Tórbjørn Jacobsen fór so langt sum at siga, at PET fungerar sum stuðulspedagogur hjá Sirið Stenberg í hennara ætlan um at forkoma føroyska fiskivinnusamstarvinum við Russland.

Jóannes Eidesgaard spurdi síðani, hvussu vit í Føroyum høvdu reagerað, um forteknini vóru øvug. Um vit brádliga fingu at vita, at onkur í Moskva hevði ein illgruna um, at JFK fremur undirgravandi virksemi í russiska partinum av Barentshavinum, og við støði í tí illgrunanum gjørdi av, at JFK var útihýst úr russiskum havnum og russiskum sjógvi? Høvdu vit góðtikið tað? Men verður hetta uppskotið samtykt, verða vit noydd til tað.

Tí vit mugu minnast til, at tey, ið taka undir við at sanktionera russar í hesum málinum, ikki gera tað grundað á fakta. Tey gera tað grundað á ein illgruna. Og tað kann skapa tað, ið nevnist precedens og reciprositet, ið merkir, at Føroyar sjálvar kunnu risikera at verða viðfarnar, sum vit viðfara onnur, nevniliga at prógv og fakta heldur ikki verða neyðugt, um onnur lond ynskja at seta sanktiónir í verk ímóti Føroyum.

Passiv lokalfeløg

Tingfundurin í dag er klokkan 13, og 2. viðgerð av tingmálinum um sanktiónir móti Russlandi er á skrá sum punkt nr. 3. Atkvøðugreiðsla verður aftaná, og verður tað samtykt, er orsøk til álvarsliga stúran hjá teimum, ið hava við fiskivinnu at gera í Eysturoynni og Norðoyggjum.

Synd er at siga, at nøkur politisk upptakt hevur verið. Hóast talan er um eitt stórmál av alstórum týdningi fyri Eysturoynna og Norðoyggjar, sum er reist av forkvinnuni í Tjóðveldi, fyrihalda Eysturoyar og Norðoya Tjóðveldisfelag seg púra kúrr um tað. Ein freistast til at spyrja, um tey í heila tikið eru virkin longur.