Havnarbáturin vann á norðoyastevnu og fyri mong var tað óvæntað, tí Havnarbáturin ikki luttók í fjør og ikki hevur vunnið ein róður síðani 2008. Tó mettu fleiri, sum Norlýsið tosaði við uppundir norðoyastevnu, at Havnarbáturin kundi koma at kappast við heilt har frammi, hóast hinir báðir vóru størri favorittar. Orsøkin er, at hetta er ein manning, har ein stórur partur var við til at vinna eitt greitt FM við 8-mannaførum í fjør við Tórsbátinum.

At Havnarbáturin vann hevur tikið allar yvirskriftirnar, og nú er spurningurin, um Klaksvíkingur ella Norðingur fara at svara aftur í dag. Á norðoyastevnu fekk Klaksvíkingur góðan start og Norðingur vánaligan start, meðan Havnarbáturin hevði besta endaspurtin.

10-mannaførini rógva kl. 17.15, um skráin heldur.